Donostia osoa laranja kolorez tindatu nahi dute

II. Markel Txapeldun Memoriala egingo dute maiatzaren 28an, Altzako Arriberri plazan; irabazi guztiak Aspanogi elkartearentzako izango dira.

Lide Ferreira

Altza

2017/04/26

II. Markel Txapeldun Memoriala aurkeztu dute udaletxean, Aspanogi eta La Oreja de Van Gogh musika taldeko kideen babesarekin. (Argazkia: Lide Ferreira)

2014an, lau urte betetzear zela, minbiziaren ondorioz zendu zen Markel Jimenez altzatarra. Iaz, bere omenez egin zuten lehen aldiz Markel Txapeldun Memoriala, eta 3.000 lagunek baino gehiago hartu zuten parte. Aurten, haur minbiziaren aurka borrokatzen duten haur guztien eta haien familien aldeko ekitaldia egingo dute. Halaxe aurkeztu dute gaur udaletxean, Aspanogi elkartearen eta La Oreja de Van Gogh musika taldeko kide batzuen babesarekin. Maiatzaren 28an izango da, 11:00etatik 19:00etara, Altzako Arriberri plazan (Casares kultur etxearen aurrean). Markel Txapeldun Memorialaren helburua da haur minbiziaren errealitatea ezagutzera ematea, heriotzaren tabuak haustea eta gaiari buruz naturaltasun osoz hitz egin ahal izatea. Gainera, aurten, asmoa da hiri osoa laranja kolorez tindatzea. Horretarako, kamisetak ez ezik, banderak ere jarri dituzte salgai (Garbera merkataritza zentroan erosi daitezke), gaixotasunarekin bat egiteko eta elkartasuna adierazteko. “Denei animatzen zaituztegi bandera erosi eta zuen balkoietan jartzera, lortzen den diruaren %100 Aspanogirentzako izango delako”, nabarmendu du Adrian Jimenezek, Markelen aitak. II. MARKEL TXAPELDUN MEMORIALA – Maiatzak 28, igandea

11:00. Pailazoak. Kiki, Koko, Moko. Katapuntxispun. Musika, buruhandiak, kamisetak eta banderak, puzgarriak, haur jolasak, ziba txapelketa, lasterketa-autoen erakustaldia, narrastien erakustaldia.
12:00. Zumba solidarioa.
13:00. Minimoto DMT-en gidatze erakustaldia.
15:45. Hegazti harraparien ikuskizuna eta erakustaldia.
16:00. Ongietorria eta oroimenaren aurkezpena, Markelen ama eta aitaren eskutik.
17:00. Haur lasterketak. Puzgarriak, shiatsu masajeak, musika.
17:30. Haur tailerrak eta aurpegi margotzeak, horma solidarioa (mezuak ume gaixoei eta bere familientzat).
17:30. Minimoto DMT-en gidatze erakustaldia.
18:30. Herri krosa: 6,7 kilometro. Izen ematea herrikrosa.eus webgunean.
19:00. Sari banaketa eta Gipuzkoako haur minbizia duten ume eta beren familien aldeko omenaldia. Ondoren, agurra eta talde argazkia.

Azken bideoak