Bideo arbitratzeari buruzko elkartasunezko hitzaldi bat antolatu du Deustuko Unibertsitateko ikasle talde batek

Afrikako hainbat herrialdetako biztanleei oinarrizko beharrak asetzen laguntzeko egingo dute; bihar, ostirala, izango da, 18:00etan, Olarainen egoitzan.

Irutxuloko Hitza

2017/05/11

Argazkia: Irutxuloko Hitza

Amigos Solidarios elkartearekin batera, proiektu batean murgildu da Deustuko Unibertsitateko ikasle talde bat. Proiektu horren helburua da Afrikako hainbat herrialdetako biztanleei oinarrizko beharrak asetzen laguntzea; bereziki, haurrei, emakumeei eta behar bereziak dituztenei. Hori lortzeko, elkartearen lehentasuna bertako baliabide eta materialak erabiltzea da, bertako ekonomia sustatu ahal izateko. Ikasle taldearen erronka da aurrekonturik gabe pertsona horientzat ahalik eta laguntza gehiena lortzea: “Izan ere, hemen lortzen ditugun irabaziek eragin zuzena izango dute pertsona horien bizitzan“. Hala, futbolaren munduan teknologiak izan dezakeen eraginari buruz hitzaldi bat antolatu dute. Zehazki, bideo arbitratzea izango dute hizpide bihar, ostirala, 18:00etan, Olarainen egoitzan (Ondarreta pasealekua, 24). Sarrerak 3 euro balioko ditu. Bertan parte hartuko dute: Santi Merino (kirol zuzenbidean aditua eta EHUn kolaboratzaile akademikoa), Roque Arambarri (Deustuko Unibertsitateko komunikazio graduko ikaslea eta Radio Marca Donostia eta Deportes COPE Gipuzkoa irratsaioetako ohiko kolaboratzailea), Aitor Gorostegi (Bigarren Mailako futbol epailea) eta Julen Escalero (Hirugarren Mailako futbol epailea). Hitzaldia Itziar Garciak gidatuko du, kazetaria eta Piolet enpresaren komunikazio publiko eta kirol arduraduna.