Ibilaldi bat egingo dute Bidebietan barrena

Parte hartzeko, izena eman behar da igandea baino lehen, Olatu Talkaren webgunearen bitartez.

Lide Ferreira

2017/05/12

Bidebieta. (Argazkia: Estitxu Zabala)

Altzako Historia Mintegiaren eta Kontadores Zentroaren ekimenez, Bide ugari Bidebietan izeneko ibilaldia egingo dute maiatzaren 20an, larunbata. Olatu Talkaren programaren jardueretako bat da, eta 10:30ean abiatuko da Kontadorestik. Auzoko garai bateko eta egungo bizilagunen laguntzarekin, bidean aurkituko dituzten interesguneak haien oroitzapenez jantziko dituzte. Halaxe azaldu dute Altzako Historia Mintegikoek: “Bide ugari daude Bidebietan, eta guk bat aukeratu dugu”. Ondorengoa izan da egingo duten ibilbidea: Kontadores – Portua – Gomistegi baserria – Mogambo – Ur biltegiak – Ikastetxe horia – 12. blokea – Guardaplata bidea – Autobus gidarien etxebizitzak – Lehenengo parrokia – Tiro Nazionala – Tunela – 4. blokea – Bidebieta elkartea – Parkea – Moneta baserria – Bankuko langileen etxebizitzak – Merkataritza guneak – Erretiratuen elkartea – Kontadoresko urbanizazioa – La Asuncion ikastetxea – Gaiztarro – Guardaren etxea – Antzinako untziralekua. Parte hartu nahi izanez gero, izena eman behar da Olatu Talkaren webgunearen bidez, igandea (maiatzak 14) baino lehen.