Kirola izan da nagusi Herrerako jaietako lehen asteburuan

Pala txapelketako finalak jokatu dituzte, mendi irteera bat antolatu dute eta Joakin Intxausti Pipas herri krosaren 37. ekitaldia egin dute.

Lide Ferreira

2017/06/12

Herrerako jaietako krosa. (Argazkia: Herrerako jaiak)

Herrerako jaien bereizgarrietako bat da oso luzeak direla. Aurten, zehazki, ekainaren 10etik 23ra izango dira. “Hasi ginen asteburutxo batekin, eta azken urteotan asko sustatu ditugu eta sortu dugu egitarau luze bat”, azaldu zioten IRUTXULOKO HITZAri jai batzordekoek. Lehenengo asteburua pasa da, eta kirola izan da nagusi. Izan ere, pala txapelketako emakumezkoen eta gizonezkoen finalak jokatu dituzte, mendi irteera bat antolatu dute, eta Joakin Intxausti Pipas herri krosaren 37. ekitaldia egin dute. Aste honetan festa giroak ez du etenik izango. Gaur, bihar eta etzi danborrada eta dantza entseguak egingo dituzte, eta ostegunean txupinazo elegantea ospatuko dute. Ostiralean, berriz, musika emanaldiek izango dute protagonismoa: Non Servium, Porco Bravo eta Desembragadores taldeak igoko dira eszenatokira. Egitarau osoa hemen.