Konstituzio plazaren bigarren mendeurrena ospatuko dute
(Argazkia: Estitxu Zabala)
- EKAINAK 23 (19:00). San Joan bezperako udalbatzaren dantza, eta San Joan sua.
- EKAINAK 24 (22:00). Donostiako Orfeoiaren doako kontzertua. 1.500 aulki jarriko dituzte herritarrentzat.
- EKAINAK 25. Donostiako Udal Txistulari Bandaren emanaldia, eguerdian. Kontzertuaren ostean, hiriko dantza taldeetako haurrek dantzatuko dute Haurren esku dantza. Aurretik, txistulariek Diana eta Argi Soinua eskainiko dituzte, erdiguneko kaleetan, San Juan zortziko zaharra joz.
- EKAINAK 23, 24 eta 25. Udaletxea, iaz bezala, herritarrentzat zabalik egongo da: OOstiralean, 16:00etatik 20:00etara; eta, larunbatean eta igandean, 11:30etik 14:00etara eta 16:00etatik 20:00etara. Bisita gidatuetan parte hartzeko aukera egongo da, baina aurretik izena eman beharko da. Bisitariek plazaren duela 200 urteko itxura ikusiko dute, 3 dimentsiotako errealitatean.
Plaza Berria, jatorrizko izena
Hiriak bere historia osoan izan duen hondamendirik handiena izan zen 1813koa, eta, horregatik, hiria berreraiki behar izan zuten hurrengo urteetan. Napoleonen tropa frantsesek Donostia bost urtez okupatuta eduki zuten, eta 1813an, erasoari ekin zion britainiar armadak, espainolenarekin aliaturik. Hala kontatzen du Donostia Sutan 1813-2013 elkarteak: “Hiriak zituen 600 etxeetatik 35 bakarrik geratu ziren zutik, 1.000 donostiar inguru babesik gabe tiroz edo baionetaz erail zituzten, tropek eta beren ofizialek emakumeak, zaharrak nahiz neskatoak, sistematikoki bortxatu zituzten…”. Elkarte berak eskaera egin zuen 2013an, Konstituzio plazak bere jatorrizko izena berreskuratu zezan: Plaza Berria.
