Sardiñerria gala egingo dute Aste Nagusi Piratan
Sardiñera kofradiako kideek azaldu dute aurten Donostiako Piratek 15 urte betetzen dituztela eta ospatzeko gogoz daudela. Horregatik, Sardiñerria gala egingo dute abuztuaren 16an Guardetxean arratsaldeko 20:00etan hasita. “Sardiñerok ere gure kuttuna bihurtu den Sardiñerria festari ekarpen berezi bat egiteko asmoz gabiltza”.
Horretarako, arte adierazpide ezberdinetako artistaz osatu nahi dute aurtengo gala berezia: “Antzerki, arte plastiko, ipuin kontalari, klowna, performancea, musika… edo bakoitzak barruan duena bideratu eta askatzeko baliatzen duen edozein espresio atsegin dugu”. Sardiñerria gala posible egin ahal izateko jendeari lotsak eta zalantzak alde batera utzi eta elkarrekin oholtzara salto egiteko deia zabaldu dute. Azaldu dute jaiaren helburua normalean horretarako aukerarik ez duten emakumeei* eta euskarari leku bat eskaintzea dela. Emanaldi bakoitzak 10 minutuko iraupena izango du. Amaitzeko, “dantza eta dantza askatuko dituzte tentsioak eta emozioak” DJen saioen laguntzaz.
Izena emateko sardinerria@gmail.com helbidera idatzi behar da: “Animatu eta ez zalantza izan gurekin kontaktuan jartzeaz edozein gauza argitzeko, emailera idatziaz edota kofradiako kideren batengana joaz”.
