Mugikortasuna errazteko aplikazioa sortu du Donostiako Udalak

Donostia Transport du izena eta sakelakoaren bidez erabili daiteke

Inaxio Esnaola

2017/07/17

Jon Insausti eta Pilar Arana zinegotziak, aurkezpenean. (Argazkia: I. Esnaola)

Bisitariei eta donostiarrei zuzenduriko sakelakorako aplikazioa sortu du Donostiako Udalak. Donostia Transport du izena eta garraio zerbitzu nagusiei buruzko informazioa nahiz aparkalekuen okupazio maila eskaintzen du. Pilar Arana Mugikortasun zinegotziak eta Jon Insausti zinegotziak eskaini dituzte xehetasunak. “Hiri osasungarriagoa, iraunkorragoa eta seguruagoa izatea lortzea da aplikazioaren xedea”, adierazi du Insaustik. Hain zuzen ere, erabiltzailearen joan-etorriak optimizatzea du helburu. Informazioa denbora errealean ematen du aplikazioak, erabiltzailearen kokapenaren arabera, mugikortasun aukera egokienari eta aparkaleku egokienari buruz, gailuaren geolokalizazio funtzioari buruz. Garraio zerbitzuei dagokienez, Dbus hiri garraioko zerbitzuari, Dbizi bizikletak alokatzeko zerbitzu publikoari eta taxi zerbitzu publikoari buruzko informazioa ematen du aplikazioak. Garraio zerbitzu horietan aldaketa garrantzitsuren bat ematen bada, aplikazioak abisuak sortzen ditu erabiltzaileentzat. Aurrera begira, udalaren asmoa da aplikazioaren bidez zerbitzu berriak eskaintzea. Esaterako, TAO sistemaren informazioa. Donostia Transport aplikazioa lau hizkuntzatan erabili daiteke: euskaraz, gaztelaniaz, ingelesez eta frantsesez. Android eta iOS (Apple) gailuentzako dago erabilgarri eta 5 megako pisua du.