Hamabost urte horietatik azken bietan baino parte hartu ez badugu ere, ilusio eta irribarre bihurriz, itxaropentsu gaude aurtengo Aste Nagusi Pirataren zain, gure ekarpen txikia egiteko irrikatan. Piraten mugimenduaren ikusle soilak ginen talde bat biltzea lortu genuen parte hartzaile aktibo izateko bidea eraikitzeko; eta itsasontzien oihal txikienak soinu gehien egiten duela ikusita, bere izena hartu genuen: Eskandalosa.
Jaia gizartearen eraldaketarako beharrezkoa iruditzen zaigu, horregatik, festetan eragiten saiatu nahi dugu, lortu nahi dugun Donostia eta gizartea geure egin arte. Aste Nagusia pretxupinazo eskandalosoarekin hasiko dugu, Sagueseko frontoian bazkaldu ondoren Ubarroiekin txupinazora joateko.
Larunbatetik iganderako gauean bertan, Eskifaiarekin, parrandaren militanteen argazkia eta gaupaseroentzako gosari banaketa egingo dugu. Biziraunez gero, igande arratsaldean Desafioan parte hartzera ausartu… Eta asteazkenean (19:00etan) Eskandalizatu! antolatu dugu Alde Zaharreko kaleetan zehar; donostiar, turista eta giriei koloreak ateratzeko! Beraz… Pirata ez lokartu, Eskandalizatu!
Eskandalosa kofradia
