Bolatan aritu dira Aieten

Nerea Lizarralde

2017/09/16

https://youtu.be/1ZVHLiBhi7M Hiru urte inguru dira Aieten bolatokia berreskuratu zutenetik. Geroztik, Aieteko jaietan bola txapelketa egiteko ohitura berrartu dute. Gaur goizean bola jokoan aritu dira hogei parte hartzaile inguru. Asko Zarauztik etorri dira, batzuk Gabiriatik, eta Segurako ordezkariren bat ere etorri da Aietera. Aieteko Xabier Lazkano gaztea izan da irabazlea; bigarren postuan geratu da Altzako 84 urteko Antonio Goenaga beteranoa; eta hirugarren, Hernaniko Fernando Gallego. Goiz osoa eman dute lehian, euriaren mehatxupean. Azken zatian euri zaparrada handia bota du, baina ez dute txapelketa eten. Jolastokin, Aiete kirol elkartearen egoitzan banatu dituzte irabazleentzako sariak, eta ondoren, Munto aldera joan dira, Toka txapelketa abian jartzeko. Manuel Matxain bolari ospetsuarekin lehian ibilitako beterano bat ibili da tokan. Eguraldi euritsua dela eta, gaur arratsalderako anfiteatroan egin behar zituzten ekitaldiak Lantxaben egitea erabaki dute. Asteburuko egitaraua: Irailak 16, larunbata 11:00 Manuel Matxain bolo txapelketa Jolastokin. 12:30 Toka txapelketa Munton. 17:00-20:30 Ekitaldiak Katxola baserrian. 17:00 Afizionatuen pilota partidak. 18:00 Miramongo anfiteatroan, kontzertua. Festara! Easo abesbatzako Cum Jubiloren eskutik. 19:30 Erromeria Katxolan: 3txulo txaranga, trikitixa, musika herrikoia… Irailak 17, igandea 10:00 Diana. 11:00 Kantu jira eta txistulariak. 14:00 Herri bazkaria Topalekun.