Kirol diru laguntzak eskatzeko epea ostiralean amaituko da

Onartutako diru laguntzek eskola kirolari, emakumezkoen kirolari, kirol egokituari eta Euskal Herriko Kirolei lehentasuna emango diete.

Lide Ferreira

2017/09/26

Gazteak herri kirolak egiten, Bidebietako kiroldegian. (Argazkia: Agurtzane Altuna)

Donostia Kirola-k aurtengo kiroletako diru laguntzen deialdia onartu du. Hala, 785.000 euro banatuko ditu hirian kirolaren alde lan egiten duten erakundeen artean, iaz baino %5 gehiago. Plangintza estrategikoan ezarrita dauden ildoei jarraituz, onartutako diru laguntzek eskola kirolari, emakumezkoen kirolari, kirol egokituari eta Euskal Herriko Kirolei lehentasuna emango diete. Diru laguntzak hiru ataletan banatu dituzte: kluben ohiko funtzionamendurako laguntza (430.000 euro), eskola kirolerako diru laguntzak (245.000 euro); eta aparteko kirol jarduerak antolatzeko laguntzak (110.000 euro). Diru-laguntzen eskaerak aurkezteko epea irailaren 29era arte luzatuko da. Interesa duten elkarte guztiek informazio osoa kontsultatu eta beharrezkoak diren inprimakiak jaitsi ditzakete Donostia Kirola-ren webgunean.