Turismoaren arazoari aurre egiteko ideiak proposatu dituzte
Hausnarketarako talde txikietan banatu dira lehenengo. (Argazkia: Lide Ferreira)
Hiru galdera, abiapuntuak finkatzen joateko
Arratsaldeko saio horretan, parte hartzaileak bi taldetan banatu dituzte, eta hiru galdera erantzun behar izan dituzte: Orain arte entzundakotik, zer nabarmenduko zenuke?; zertan du eragina turismoak zure bizimoduan?; nola egin aurre egoera honi? nondik abiatuko zinateke? Besteak beste, askotan errepikatu den ideia izan da turismoak bere baitan beste hainbat arazo dituela: etxebizitzen prezioen igoera, lan prekarioak, auzoan izaera galtzea… Horrek guztiak dakar Erdialdean eta gune turistikoetan bizi den jendea beste auzo edo herrietara joan behar izatea: “Guztia interes pribatuen onura bermatzeko”. Parte Zaharraren egoera bereziki larria dela azpimarratu dute parte hartzaile guztiek, eta kezkatuta azaldu dira: “Hiria lapurtzen ari dira, auzotarrak bertatik kanporatzen, eta Donostiako gero eta jende gutxiago doa Parte Zaharrera”. Azken batean, espazio publikoa, nolabait, hiritarrak “galtzen” ari direla esan dute: “Egiten den erabili onartu dugu, eta ez gara konturatzen espazio hori galtzen ari garela”. Egoera honi aurre egiteko, zenbait proposamen egin dituzte hausnarketa tailerrera hurbildu direnak; tartean, eragile desberdinak bilduko dituen topagune moduko bat sortzea eta turismoaren arazoa ikusaraztea. Hausnarketaren ondorio eta proposamen sakonagoak datorren ostiralean argitaratuko ditu IRUTXULOKO HITZAk.
