Artatxiki pastela, arrautza eskalfatuarekin eta txipiroi saltsarekin

Irutxuloko Hitza

2017/10/06

Intxaurrondoko Makrobiotika jatetxea

Artotxiki pastela, arrautza eskalfatua eta txipiroi saltsarekin. (Argazkia: Nerea Lizarralde)

Osagaiak:

Artatxikia (kikara bat) Lenteja gorria (kikara erdia) Porru bat Azenario bat Ura (5 kikara) Gatza Oliba olioa Tamari saltsa Oliba olioa Arrautza eskalfatua Txipiroi saltsa edo tomate saltsa

Prestaketa:

Artatxiki pastela prestatzen hasteko, barazkiak garbitu behar dira eta denak ongi txikitu. Gero, oliba oliotan erregosi behar dira.

Ondoren, ura gehitu behar da . Irakiten hasten denean, artatxikia eta lenteja gorria bota behar da. Tapa jarri behar da, eta su eztian, 18 minutu utzi behar da. Gorka Gereñok azpimarratu du garrantzitsua dela artatxikia ongi prestatzea, eta gako garrantzitsu bat ura ongi neurtzea dela esan du. Kikara bat artatxiki erabiltzen badugu, bost kikara ur bota beharko ditugu. Hori da neurri egokia sukaldariaren ustez. Bi pertsonentzako kantitate aproposa izan daiteke. Denbora neurtzea eta sua suabe jartzea ere garrantzitsua dela dio. Osagai guztiak kozinatzen direnean, lapikotik atera eta beste edukiontzi batean utzi behar da, epeltzen uzteko. Ondoren, txipiroi saltsa egin behar da, eta arrautza eskalfatu. Beste gomendio bat: plater hau kozinatu nahi badugu, eta txipiroi saltsarik ez badugu, tomate saltsa bota daiteke. Platera egiteko osagai guztiak izango genituzke jada. Beraz, platera txukun prestatu behar da. Artatxikia molde baten barruan sartuko dugu. Jogurt pote bat erabili daiteke, hondoa kentzen badiogu. Artatxikiaren gainean jarriko dugu arrautza, kontu handiz. Plater hau bere jatetxean prestatu ohi du Gorka Gereñok, baina ez dago kartan, berak egunero prestatu ohi baitu menu desberdin bat. Barazki eta zereal ekologikoak erabiltzen ditu plater honetarako. Ohiko errezetetatik aldentzeko proposamen bat egin nahi izan du Gereñok;?errezeta desberdina baina erraza.

Gorka Gereño, Intxaurrondoko Makrobiotika jatetxeko jabea

«Makrobiotika kozinatzeko beste modu bat da»

Gorka Gereño, Makrobiotika jatetxeko sukaldaria. (Argazkia: Nerea Lizarralde)

Nola sortu zenuen Makrobiotika jatetxea? Nik hemen 13 urte daramatzat, baina proiektu hau lehenago sortu zen Makrobioteka elkarte gisa. Lehen elkarte eta denda zena jatetxe bihurtu zen, eta nik hartu nuen proiektuaren ardura. Noiz hasi zinen sukaldari gisa? Arzak-en hiru urte egin nituen, Ipar Euskal Herrian urtebete eman nuen, Usurbilen ere egin dut lan, Basque Culinary Center-ekin ere proiektuak egin dut. Txoriene telebista saioan ere parte hartzen dut, eta hemen bertan, jatetxean, makrobiotika ikastaroak ematen ditut. Donostia Kulturako ikastaroetan ere eskolak ematen ditut. Zailagoa al da jatetxe makrobiotiko bat irekitzea? Kozinatzeko beste modu bat da makrobiotika. Nire gorputzarentzat ona izan da, eta beraz, nik konbentzituta egiten dut sukaldaritza makrobiotikoa. Ni hemen Intxaurrondon ikasi nuen. Sukaldaritza eta elikadura osasuntsua elkartzeko modu on bat iruditzen zait makrobiotika. Orain iruditzen zait jendeak gero eta kezka handiagoa duela elkikaduraren inguruan, eta makrobiotikak hori ematen du, hain zuzen. Jendeak bere burua zaindu nahi du, baina ez daki nola, hori ikastaroetan sumatu dut. Informazio asko falta zaio jendeari. Gaixotasunekin lotu ohi du makrobiotika. Zaila izan da etiketa hori kentzea, baina ari gara pixkanaka. Prebentziorako lagungarria da makrobiotika, norberaren beharretara egokitzen delako, baina ez du miraririk egiten, noski. Ohiturak aldatzen hasi behar dugu, gure esku dago gure osasuna. Nolako karta izan ohi duzu? Egunero menu desberdin bat prestatu ohi dut, ez dago kartarik. Soilik eguerdian irekitzen dut jatetxea, bazkariak emateko. Aurreiritzi asko al dago makrobiotikaren inguruan? Ni makrobiotikoa naiz, baina oreka mantendu behar da. Ez da erotu behar, makrobiotika XXI. mendera ekarri behar da. Zein jatetxe gomendatuko zenuke? Groseko Tedone jatetxea.