Ezkutaketa txapelketa egingo dute bigarrenez Uliako udazkeneko jaialdian

Uliako Lore Baratzak-ek esan du ospatuko dutela EAEko Justizia Auzitegi Nagusiak onartu egin duen Ategorrieta eta Uliarako hirigintza planaren birmoldaketaren aurkako helegitea.

Lide Ferreira

Ulia

2017/10/18

Musikarako tartea ere egongo da udazkeneko jaialdian. (Argazkia: Uliako Lore Baratzak)

Uliako Lore Baratzak-en ekimenez, igandean (urriak 22), Uliako mintegien parkean udazkeneko jaialdia egingo dute. Auzotarrek beraiek antolatutako hainbat jarduera prestatu dituzte: tailerrak, kontzertuak, antzerkia, piknika… Beraz, egun osorako egitarau zabalaz gozatzeko aukera izango dute. Era berean, ospatuko dute EAEko Justizia Auzitegi Nagusiak hartutako erabakia: Uliako mintegietan eraiki nahi zituzten 70 etxebizitzen proiektua geldiarazi du, plan hori aldatzeko beharrezkoa den ingurumen txostenik gabe eraiki nahi zirelako etxebizitzak. Programari dagokionez, umeak izango dira protagonista egunaren hasieran. Izan ere, II. Ezkutaketa txapelketa egingo dute, 11:00etan, 14.450 metro koadrotako espazio batean. Haurrek parte hartuko dute euren familia edo lagunekin, eta parkea erabiliko dute bertan dauden txokoetan ezkutatu ahal izateko. Iaz 150 lagun baino gehiagok hartu zuten parte, eta aurten kopuru hori handitzea espero dute. Izena emateko ezkutaketa.txapelketa@gmail.com posta elektronikora idatzi behar da, parte hartzaileen izen-abizenekin, haurren adinekin eta jolaserako asmatu duten bikote edo taldearen izenarekin. Egunean bertan ere izena emateko aukera egongo da, 10:30ak aldera.

Sukaldari baten antzezlana

Horretaz gain, Ireki begiak Mary antzezlana eskainiko dute, parkearen goiko parkean, Groseko berotegian. Sukaldari baten istorioa kontatuko dute, eta elikadura osasuntsu baterako behar diren produktuak izango dituzte hizpide. Trikitilarien musikak goizeko jarduerak girotuko ditu; eta, arratsaldean, berriz, bi taldek joko dute: Low Riders (country-rock-psikodelia), 15:30ean, eta Gasteizko Xarpa taldea (rock melodikoa), 17:00etan. Gainera, hiru tailer egingo dituzte egunean zehar: eskuz egindako lihoaren lanketari buruzkoa, 12:30ean; zirkoa familian, 15:30ean; eta harri bat adoptatu, 16:30ean. Jaialdiaren helburua da Uliako mintegietan garatzen ari den proiektuaren berri ematea eta parkea ezagutzera ematea. Uliako Lore Baratzak udalaren baimena du parkearen kudeaketarako eta bertan jarduera parte hartzaile ugari antolatzen ditu. EGITARAUA – ULIAKO UDAZKENEKO JAIALDIA 2017 – URRIAK 22, IGANDEA

11:00. II. Ezkutaketa Txapelketa. 10:30ean, azken izen emateak eta dortsalen jasotzea. 12:00etan, sari banaketa.
12:00 eta 13:00. Ireki begiak Mary antzerkia Groseko berotegian.
12:30. Eskuz egindako lihoaren lanketa, tailerra Bire Kurthekin.
12:30. Udazken ereitea.
14:00. Piknika.
15:30. Low Ridersen kontzertua, zelaian.
15:30. Zirkoa familian, Xomorro taldearekin tailerra.
16:30. Adoptatu harri bat, tailerra Marta Bozarekin.
17:00. Xarpa taldearen kontzertua, zelaian.