Karlos I.aren etorbideko errepidearen azpiko gunean jolas parke bat egingo dute. (Argazkia: Hitza)
Joan den astean Pilar Arana Mugikortasun zinegotziak bilera bat egin zuen Karlos I.aren etorbideko bizilagunekin, auzoa bitan banatzen duen gune hau berritzeko bigarren fasea azaltzeko. Bizilagunek “desengailu handia” hartu dutela dio Lierni Lasa Barianterik Ez plataformako kideak: “Jendeak uste zuen saihesbidea kenduko dutela esango zuela Aranak, EAJ eta PSE-EEren gobernu itunean hala jasota zegoelako. Guri [plataformako kide batzuei] aurretik jada bilera batean argi utzi ziguten legealdi honetan ez zutela itxiko saihesbidea, nahiz eta horrela egingo zutela zin egin zuten. Halere, uste genuen auzoko gune hau hobetzeko plan hobea aurkeztuko zigula. Oraindik zirriborro itxura duela dirudi, dena zehazteko dagoela ematen du. Eta gure ustez, eskasa da”.
Lasak kontatu du bilera hasi eta berehala esan zuela Aranak, “argi eta garbi”, Karlos I.aren hiribidea ez dutela itxiko: “Nik pentsatu nahi dut ez dutela legealdi honetan egingo, hori esan nahi zuela. Baina halere, hurrengo legealdietan ere ez dutela egingo uste dut. Atzo aurkeztu zizkiguten proposamenak oso eskasak izan ziren. Politikariek huts egin digute. Hauteskunde kanpainan iragarritakoa eta hitzarmenetan sinatutakoa ez dute bete. Jendea oso haserre eta etsita dago”.
Karlos I.a ixteko proiektuaz baino gehiago, bilera horretan sahiesbidearen azpian dagoen gunea [Podavines ingurua] hobetzeko plana izan zuen hizpide Aranak. Hala uste du Lasak: “Aspaldiko aldarrikapena da, auzoko gune kritiko bat delako. Oso degradatua dago inguru hori. Eta guk beti eskatu dugu hau hobetu behar dela. Enpresa bati eskatu omen diote azterketa bat egiteko. Ez dute asko zehaztu, baina espero dugu itxura hobea hartzea. Egia esateko, ez da batere zaila egun dagoena hobetzea”.
Lasak esan du duela urte eta erdi prentsaren bidez izan zutela udala eta aldundiaren arteko hitzarmen baten berri: “Donostiako sarbideen inguruko azterketa eta plangintza bat egiteko lanean hasi omen ziren orduan. Baina azterketa hori berandu iritsi da, hori duela 10 urte egin behar zuten, hiriko bigarren gerrikoa abian jarri zutenean. Oso motel ari dira lanean, eperik gabe eta konpromisorik erakutsi gabe. Politikariak sei hilabetean behin bildu behar ziren, teknikariak hiruhilabetean behin… Baina uste dugu Karlos I.aren etorbidea ixteko mobilizazioak isilarazteko hitzarmen bat besterik ez zela izan”.
Gainera, uste dute soilik zirkulazioaren ikuspegitik ari direla lantzen plana: “Batzorde horretan soilik ingeniariak eta politikariak daude. Urbanista baten ikuspegia ezinbestekoa da, auzo bat birgaitzeko proiektu bat dagoelako proiektu honen muinean. Auzoa asko degradatu da, besteak beste, Karlos I.aren saihesbidea dela eta. Badirudi ingurumena, kutsadura eta zarata ez zaiela inporta, soilik zirkulazioan izan dezakeen eragina aztertzen dute. XXI. mendean bizi gara eta guretzat hauek dira kontuan hartu beharrekoak. Guretzat oinarrizkoak dira”.
Bizilagun gutxi joan ziren bilerara, eta Lasak dio ez zela bizilagunek nahi zuten moduan egin: “Bilera auzoan egin nahi genuen, eta bilera joateko gutunak soilik Karlos I.aren etorbideko bizilagunei iritsi zitzaien. Gure ustez auzo guztiari eragiten dio proiektu honek, asko direlako kaltetuak. beste bilera bat egin nahi dugu. Eneko Goiak agindu zuen bezala, bielra bat nahi dugu auzoan”.
Etsita daudela azpimarratu du Lasak: “Airean geratu da dena, ez dago eperik. Aurkeztu dituzten aldaketak oso txikiak dira. Gu 2007tik ari gara borrokan, radar bat jar dezaten. Eusko Jaurlaritzari dagokio radarra jartzea. Eta geroztik ez dugu ezer lortu. Bete gabeko promesak izan dira guztiak. Hamaika azterketa egin dira honen inguruan, eta denetan ondorioztatzen zen posible zela ixtea. Baina ez dute ezertarako balio, aldundiak beste interes batzuk dituelako, eta ez dutelako hau konpondu nahi. Eurek enkargatu dituzte azterketa horiek, denok ordaindu ditugu, eta orain ez dituzte ezertarako erabili. Martuteneko biribilgunea moldatzeko proiektua ere zertan da? Tiradera batean daude gordeta”.
