Oliyos taberna eta jatetxea
Hegaluzea antxoarekin. (Argazkia: Lide Ferreira)
:
400 gramo hegaluze
Tipulin bat
25 oliba bete
20 Ibarrako piper
6 hosto letxuga
4 burruntzali maionesa
Antxoak
Oliyos taberna eta jatetxean pintxoak oso ohikoak dira eta arrakasta handia izaten dute bezeroen artean. Gehien eskatzen diren horietako bat da hegaluzea antxoarekin. Prestatzerako orduan, oso garrantzitsua da osagaien neurriak ondo erabiltzea, horrela bakarrik lortzen baita nahasketa egokia.
Hasteko, tipulina bat, atunez betetako 25 oliba eta Ibarrako 20 piper nahastu eta txikitu behar dira, janaria xehatzeko makina batekin. Hori ondo birrinduta dagoenean, sei letxuga hosto gehitu behar zaizkio nahasketari, eta berriro txikitu behar da guztia, eta katilu batean utzi.
Hegaluzeak ez du oliorik izan behar, eta osagai hori papurtu beharra dago, eskuekin. Aurretik egindako nahasketan sartu behar da hegaluzea txikitua eta berriro nahastu, maionesa gutxinaka botatzen den bitartean.
Azkenik, pintxoaren ogia labean sartu behar da, eta horren gainean lortutako nahasketa eta antxoa bat jarri behar dira.
Josetxo Irurtia, Oliyos taberna eta jatetxeko jabea
Josetxo Irurtia, Oliyos taberna eta jatetxeko jabea. (Argazkia: Lide Ferreira)
1953an zabaldu zuen nire familiak Oliyos, duela 64 urte. Ostalaritzaren munduan hasi aurretik, Parte Zaharreko olio biltegi batean lan egiten zuen aitak eta, horregatik, bizilagunek Oliyos deitzen zioten. Hortik dator izena. Nik duela 35 urte inguru hartu nuen taberna, arreba eta emaztearekin batera.
Nolakoak dira taberna eta jatetxea? Zer eskaintzen duzue?
Taberna klasikoa da. Izan ere, garai bateko sukaldaritza mantentzen saiatzen gara, janari tradizionala eskaintzeko. Arrebak eta emazteak nire amaren errezetak prestatzen dituzte; eta nire amak amonarengandik ikasi zuen. Beraz, nire amonaren errezetak dasta daitezke tabernan. Eguneko platerak, karta, pintxoak, errazioak, taldeentzako hainbat aukera menuetan… denetarik daukagu.
Duela urtebete inguru, taberna eta jatetxea berritu zenituzten, ezta?
Hala da. Zortzi hilabetean obratan egon ginen. Ondoko lokala erosi genuen eta 50 lagunentzako jatetxea jarri dugu. Taberna ere goitik behera aldatu dugu eta baita sukaldea handitu ere.
Zeintzuk dira arrakasta gehien dituzten pintxoak eta platerak?
Pintxoei dagokienez, gildak, patata tortillak eta hegaluzeak antxoarekin asko eskatzen dira. Bestela, arrakasta handia dute muturrek eta tripakiek.
Aukeratzekotan, zer nahiago duzu: haragia ala arraina?
Garai batean, haragia esango nuke; baina, gaur egun, arraina. Adinarekin aldatu dut iritziz.
Donostiako zein jatetxe edo taberna duzu gustuko?
Parte Zaharreko Txepetxa taberna.
