Baratzetik platerera
Illarra jatetxea
(Argazkia: Estitxu Zabala)
«Parrillari garrantzi handia ematen diogu»
Joxean Eizmendi, Illarra jatetxeko jabea. (Argazkia: Estitxu Zabala)
Joxean Eizmendi, Illarra jatetxeko jabea
Nola definituko zenuke Illarra jatetxea? Illarra da etxe bat, baratzea eta produktuekin lotura zuzena duena. XVII. mendetik dago etxea, eta lehen inguruko lur hauek iristen ziren Tolosa Hiribideraino. Izaten ziren nobleen laborantzarako eta hiritarren osasunerako. Produktua, osasuna, ongizatea eta kultura batzen ditu etxe honek. Zerk desberdintzen du zuen jatetxea? Etxe honetan, platerean zerbitzatzen den guztia garaikoa, bertakoa eta freskoa da. Barazkiak goizean jasotzen ditugu; haragia, elikadura zaindu duten abereetatik dator; eta arrainak freskoak dira. Konfiantzazko produktuak erabiltzea gustatzen zait, eta biziak. Baratzean, adibidez, ez dugu pestizidarik erabiltzen, loreak jartzen ditugu lan hori egiteko. Noiztik duzu Illarraren ardura? Azken hogei urtean. Etxean lan egiten dute urritasun fisiko eta psikologikoak dituztenek, haiek ikaragarri erakusten digute euren iraunkortasunarekin, eta oso pozik gaude beraiekin. Zein da zuen eskaintzaren berezitasuna? Nire nahia da jendea gure kulturaren eta produktuen bueltan elkartzea, eta maitasuna ematen dugu gure plateretan. Espainiako Parrilla Txapelketako irabazlea naiz, eta jatetxean parrillari garrantzi handia ematen diogu. Parrillako menua dugu, garaiko produktuekin osatzen duguna, egurra ere hemengoa erabiltzen dugu. Parrilla ongi erabiltzea garrantzitsua da, tenperatura egokian egin behar baita produktu bakoitza. Gero, illarra da gure produktu izarra, baina bere garaian. Medikuekin eta laborategiko ikerkuntza arloarekin lanean ari naiz orain. Donostiako zein jatetxe gomendatuko zenuke? Oso galdera zaila da hori… Bertako produktuekin lan egiten dutenak gustatzen zaizkit. Hiru esango ditut; Parte Zaharreko Casa Urola, Antiguako Bernardina, eta sukaldari gisa, Xarmakoak.
