Alokairuen prezioa inoizko altuena da Donostian
Etxebizitza huts bat, Donostiako Parte Zaharrean.
Hego Euskal Herriko beste hiriburuekin alderatuta, Donostia da garestiena. “Donostiar batek Bilbotar batek baino 243 euro gehiago ordaindu behar ditu hilero etxebizitza alokatzeko (11,4 €/m²), Gasteiztar batek baino 477 euro gehiago ( 8,8€/m²) eta iruindar batek baino 467 euro gehiago (7,8 €/m²). Beste era batean esanda: orain arte Donostian bizitzea luxu baldin bazen, azkenaldian utopia bihurtzen ari da”.
EH Bilduren iritziz, alokairuaren prezioaren eta turismoaren artean “lotura zuzena” dago. “Izan ere, turisten gorakadarekin batera geratu da alokairuren prezioaren gorakada. Azken 2-3 urtetatik hona pisu turistikoen gorakada itzela izan da, eta horrekin batera, familiak, gazteak edota ikasleak bizitzeko gero eta alokairuzko etxebizitza gutxiago daude, eta gero eta garestiagoak dira”.
Proposamenak
Alokairuen prezioaren gorakadari aurre egiteko zenbait neurri proposatu ditu EH Bilduk. Horietako bat da legez kanpoko pisu turistikoak ohiko alokairura bideratzea, pasa den iraileko udalbatzan onartu zena. Akordio bera eraman zuen EH Bildu Eusko Legebiltzarrera abenduan eta bertan ere onartu zen.
Etxegintzan programa berri bat ezartzea eskatu zuen EH Bilduk. “Alokairua ordaintzeko arazoak dituzten eta beste laguntzarik ez duten herritarrentzat diru-laguntzak ematea”. Udal gobernuak, ordea, baztertu egin zuen 2018ko aurrekontuetan txertatzeko proposamena.
Udal taldearen ustez, nahiz eta udalaren eskumena ez izan, Hiri Errentamenduren Legea aldatzea “ezinbestekoa da” alokairuzko prezioei muga jarri ahal izateko eta hiriko egoera ekonomikoari egokitzeko. Horrez gain, lehen solairuko araua mantentzea eskatzen dute. “Biztanle-komunitatetan elkarbizitza hobetzeko neurria izateaz gain, pisu turistikoen kopurua kontrolpean mantentzeko ere egokia izango litzateke”.
Beste proposamen batzuk ondorengoak dira: “Aiete eta Antigua artean duen lursaila erostea proposatu dugu bertan babestutako etxebizitzak eraikitzeko. Donostian diren finantza erakundeek dituzten etxe hutsen zerrenda osatu eta Etxegintzaren eskuetan uztea proposatu dugu, etxebizitza horiek Alokabide programaren bidez alokairuan atera daitezen. 
