Baliabide Pedagogikoen Zentroa abian jarriko dute Aieteko jauregian

Irutxuloko Hitza

2018/01/10

Aieteko Bakearen eta Giza Eskubideen Etxea.

Aieteko Bakearen eta Giza Eskubideen etxeak Baliabide Pedagogikoen Zentroa izango du. Hitzarmena sinatu dute proiektua aurrera eramateko Donostiako Udalak, Eusko Jaurlaritzak eta Gipuzkoako Foru Aldundiak. 2018 eta 2019rako bakoitzak hartuko dituen konpromisoak arautu dituzte. Hori dela eta, Jaurlaritzak 112.500 euro jarriko ditu –75.000 euro 2018an eta 37.500 euro 2019an–, Aldundiak 67.500 euro –45.000 euro 2018an eta 22.500 euro 2019an– eta udalak 86.493,39 euro –57.662,26 euro 2018an eta 28.831,13 euro 2019an–. Giza eskubideei buruzko zabalpen lana egiteko balio duten bitarteko pedagogikoak sistematizatzea izango da zentroaren helburua. Era berean, Hego Euskal Herrian egun diren oroimen, bizikidetza eta giza eskubideen arloko azpiegituren osagarria izango da. Eskainiko duen zerbitzua askotarikoa izango da. Hala nola, informatuta dagoen komunitate bat sustatzea, herritarrek aukera izatea beren eskubideak ezagutu eta ulertzeko eta eskubideok egunerokotasunean errespetatzeko gauza izatea. Halaber, iraganeko eta gaur egungo giza eskubideen urraketen eta bidegabekerien jakitun izatea eta, azkenik, etorkizuna jomuga duen eta aniztasunean bakez bizitzea bilatzen duen erantzun bat emateko gauza izatea.