'Arotzaren eskuak' izan da 2017an gehien mailegatutako euskarazko liburua

Estitxu Zabala

2018/02/06

Koldo Mitxelena Kulturunea. (Argazkia: Lide Ferreira)

Asko dira irakurtzeko zaletasuna duten donostiarrak, eta era askotara lortutako liburuak irakurtzen dituzte: erositakoak, oparitutakoak, liburutegietan maileguan hartutakoak, edo lagunekin trukatutakoak. Hori kontuan izanda, erreportaje zabal bat prestatzen ari gara datorren ostiralerako. Irakurle sutsuekin hitz egin dugu, baita udal liburutegietako arduradun Arantxa Arzamendirekin ere, eta liburu saltzaileen ordezkari Adolfo Lopezekin. Hainbat datu aipatuko ditugu erreportajean, eta horien artean izango dugu liburutegietan 2017an gehien mailegatutako liburuen zerrenda. Hain zuzen, Alberto Ladronen Arotzaren eskuak izan da udal liburutegietan gehien mailegatutako euskarazko liburua, 127 aldiz eraman baitute etxera. Ladronen lanaren atzetik daude Kirmen Uriberen Elkarrekin esnatzeko ordua, eta Kattalin Minerren Nola heldu naiz ni honaino. Gaztelerazko liburuen rakinga Dolores Redondok zabaltzen du, Todo esto te dare lanarekin, 302 mailegurekin. Atzetik daude Fernando Aranbururen Patria eta Eva Garcia Saenz de Urturiren El silencio de la ciudad blanca. Gehiago jakin nahi duzu? Ba ez galdu ostiralean IRUTXULOKO HITZA!