Poltsiko Antzerkiaren jaialdiak badu bere egitaraua

Inaxio Esnaola

2018/02/06

Virginia Imazek ‘Sex o no sex’ antzezlana eskainiko du.

Hilaren 15etik martxoaren 4ra bitartean izango da XXVII. Poltsiko Antzerkiaren jaialdia. Formatu txiki eta ertaineko antzezlan zein ikuskizunek osatzen dute egitaraua. Bi hizkuntza ofizialen oreka eta emakumeen presentzia bermatuko ditu. Helburua, berriz, betikoa da: hiriare antzerki programazioa herritar gazte zein helduei hurbiltzea. Guztira 12 konpainiak hartuko dute parte, hiriko 27 espaziotan banatuta: horietatik 3 emakumezkoenak dira, 4 mistoak eta 5 gizonezkoenak. Hizkuntzari dagokionez, 5 obra euskaraz izango dira eta 7 gaztelaniaz. Ikuskizunei dagokienez, 32 dira guztira –14 euskaraz eta 18 gaztelaniaz–, eta generoari begiratuta, 9 ikuskizun emakumezkoenak dira, 9 mistoak eta 14 gizonezkoenak. Egitaraua osorik kontsultatu daiteke helbide honetan. Virginia Imaz 2017ko Berdintasunerako Emakunde Saria parte hartzaileen artean dago. Baina ez da bakarra, egitarau zabal eta interesgarrian. Halaber, euskarazko 8. Poltsiko Antzerki Sorkuntzaren irabazle eta finalista izan diren taldeek parte hartuko dute. Donostia Kulturak azken eguneko bukaera festa azpimarratu du. Hain zuzen ere, ondorengoek parte hartuko dute martxoaren 4an Egiako El Anden tabernan:Yogurinha Borova transformista, Iñigo Salinero Txaflas eta Humberto Gutierrez umoregileak, Amagoia Lauzurika Eta Kitto lanarekin, Amaia Irazabal Inor ez dator antzezlanarekin eta Telmo Trenor Dj.