Jazzaldiaren kartelaren aurkezpena. (Argazkia: Jazzaldia)
Jose Luis Lanzagortak egin du
53. Jazzaldiko kartela. Musikaria eta diseinatzaile grafikoa da Lanzagorta eta Lanzagorta Estudioa sortu zuen, Donostian, 1991n, eta, batez ere, artearen eta kulturaren esparruan lan egiten duten bezeroak ditu. Kontrabaxu baten giderra irudikatu du kartelean; haren siluetak swinga irudikatzen duela diote, erritmoz betetako formekin, eta, era berean, klasizismoaren dotoretasunari eusten dioela. Kartela aukeratzeko, lehiaketa murriztu bat egin du antolakuntzak, iaz bezala, hainbat diseinatzaile eta artista plastikoren artean.
Lanzagortak diseinatuak dira, aurretik ere, Jazzaldiko kartel batzuk, urte hauetan: 1989, 1990, 1999, 2000, 2001, 2002, 2005, 2006, 2007 eta 2008.
Sarrerak salgai, otsailaren 22an
Jazzaldia uztailaren 25etik 29ra izango da, eta ordainpeko kontzertuetarako sarrerak laster jarriko dituzte salgai: otsailaren 22an, 11:30ean.
Jaialdiaren webgunean eta Donostia Kulturaren webgunean egongo da sarrerak erosteko aukera. Hain zuzen, ordainpeko kontzertuen egitaraua, leku eta ordu zehatzekin, eskuragarri egongo da otsailaren 22rako.
