Anoeta eta erraustegiaren obretako lan baldintza prekarioak salatu ditu LABek

Iñaki Agirre

2018/02/22

Erraustegiaren eraikuntza lanen lehen fasea. (Argazkia: Gipuzkoako Foru Aldundia – David Vicente)

Anoeta estadioaren eta Zubietako erraustegiaren obretan ematen ari diren lan baldintza prekarioak Lan Ikuskaritzan salatu ditu LABek. Sindikatutik adierazi dutenaren arabera, proiektu hauetan lanean dabilen EPB azpikontratak “eraikuntzako hitzarmenak baimentzen duena baino soldata baxuagoak eta lanaldi handiagoak” ezartzen dizkie bere langileei.

Sektorean eraikuntzako enpresa handien aldetik lan kostuak merkatzeko asmoz azpikontrata hauetara jotzea “praktika orokorra” dela jakinarazi dute LABetik. Kasu honetan, ordea, bi obra hauek Donostiako Udalak eta Gipuzkoako Aldundiak sustatutakoak direla ekarri du gogora sindikatuak, “oso merke lizitatzeaz gain”, obren hitzarmenak betetzen ari diren ala ez egiaztatzeko “inongo neurrik” hartu ez dutela adieraziz.