Mentxu Gal lorategiko kafetegi proiektua bertan behera geratu da

Irutxuloko Hitza

2018/03/13

Mentxu Gal parkeko komunak.

Donostiako Udalak Mentxu Gal parkeko komunak kafetegi bihurtzeko proiektua onartu zuen pasa den urteko urtarrilean. Oscar Urrutikoetxea eta Pablo Orlandok osaturiko enpresa elkartzearen proposamenari baimena eman zioten. Ordea, bideragarritasun ekonomikorik ez duela argudiatuta esleipenari uko egitea erabaki dute. Tokiko Gobernu Batzordeak ontzat jo du erabakia. Kafetegiaren sustatzaileek adierazi zuten obra baimena eta jarduera-lizentzia eskuratzeko baldintzek negozio plana aldatzera behartzen zutela. Hain zuzen ere, eraikinaren barruan klimatizazio unitatea jartzeak, komuna handiagoa egin behar izateak, eta leihoak kanpoko barra bezala ezin erabiltzeak ez du bideragarria egiten. Hemendik aurrera zer egin aztertuko du udalak. “Eraikinaren tamainak ez du ematen horrelako negozio bat bideragarria egiteko. Aukera guztiak aztertuko ditugu, eta ez da baztertzen eraikina handitzea. Halere, lorategia eta komunak errespetatu behar direla badakigu”, adierazi du Eneko Goia alkateak. Eguzkiren eskaera Lorategia kafetegi baten beharretara “ez sakrifikatzeko” eskatu du Eguzki talde ekologistak. “Udalak egun lorategian indarrean dagoen hirigintza araua aldatzeko Plan Berezi bat sustatuko balu, orain arte bertan sartu ez den kafetegia sartzeko, Amarako berdegune hori ostalaritza jarduera pribatu baten beharretara sakrifikatzen ariko litzateke”. Horrekin batera, parkea biziberritzeko eta bertako zuhaitzak errespetatzea eskatu dute.