Starlight gaua egingo dute ostiralean, Donostiako Udaletxean

Irutxuloko Hitza

2018/04/16

(Argazkia: Donostiako Udala)

Donostiako Udalak eta Aranzadi Zientzia Elkarteak gau astronomikoa antolatu dute. Starlight gaua ostiralean izango da udaletxean, 21:00etan. Hain zuzen ere, Bergarako Ilatargi Astronomia Taldeak eta Aranzadiko Astronomia sailak teleskopioak jarriko dituzte terrazetan eta teleskopio edo prismatikoak dituzten hiritarrak parte hartzera deitu dute. Izarren argia hobeto ikusteko udalak bere argiztapena itzaliko du 21:00etatik aurrera eta ekintza ezberdinak egingo dira bertan, denak publiko orokorrari zuzenduak. Udalaren areto batean pantaila handia jarriko da, eta Stellarium izeneko zeruko programaren bidez astronomoek zeruan ikusgai dauden izarrei buruzko azalpenak emango dituzte. Horrez gain, heldu eta haurrentzako gunea jarriko dute, eta guztien artean izarren argia eta argi kutsadura ardatz duen mural handia marraztuko dute. Gaua iristerakoan ilunaldia egingo da (21:00etatik 23:00etara), eta aldi berean ekintza guztiak eskainiko dira. Jatorria 2007ko apirilaren 20ean Starlight Konferentziak gaueko zeruaren balioak babesteko nazioarteko kanpaina egiteko erantzunkizuna hartu zuen. Gauak argi kutsaduratik babesteko helburuarekin neurriak hartu behar direla aldarrikatzen dute, herritarrek izarrak ikusteko duten eskubidearekin batera. Instituzio publiko nahiz pribatuei ekimen honetan parte hartzeko deialdia egin zuten. Azken urteetan, hainbat herrialdek bat egin dute deialdiarekin, astronomia ardatz duten festa desberdinak antolatuz.