Zinema, guztien eskura
SADE enpresa elkarlanean aritu da Gautenarekin, Autismoaren Gipuzkoako Elkartearekin, eta otsailetik abian dute ‘Besaulki urdina’ programazioa, Antiguo Berrin.
Aurreko bi saioen arrakasta ikusita, Besaulki urdina programarekin jarraitzeko gogotsu daude SADEko langileak. Zinema saio egokituak eskaintzen ari dira, saio arruntetan parte hartzeko zailtasunak dituztenentzat, hau da, adimen edo garapen urritasunen bat dunenentzat, haiek ere zinemaz gozatzeko aukera izan dezaten. SADEko Iñaki Elorza eta Ane Zalduarekin egon gara, eta jardueraren berri eman digute.
Proiektua gauzatzeko, Gautena Autismoaren Gipuzkoako Elkartearen laguntza izan dute hasieratik: «Gautena elkartearekin aspalditik dugu harremana, eta urtean bizpahiru aldiz antolatzen genituen halako saioak, haiek eskatzen zigutenean», dio Elorzak. Iazko urtearen bukaeran, ordea, kontua serioago hartzea erabaki zuten, eta programazio bat eskainiko dute, urte guztian. «Programazio zehatza erabakitzea zaila da, urte guztiko estreinaldiak ez dakizkigulako. Hori bai, proiekzio bakoitzean esaten diegu hurrengo saioaren eguna eta pelikula», azaldu du Elorzak. «Prentsa oharrean landu genuena Gautenaren argumentarioa da, inork baino hobeto dakitelako zeintzuk diren kolektibo horren beharrak», gehitu du Zalduak.
Komunikazioan bultzada bat behar zutela erabaki zuten: «Irudi bat sortu dugu, eta izen bat jarri diogu, aurrekontu bat bideratuta. Hori izan da SADEren apustua. Badakigu saioak ez direla beteko». Horrela bada, hilabetean behin eskaintzen dituzte saio egokituak, igande goizetan: «Zinemaren kontsumoa ere ohitura kontua da. Familia hauentzako erritmoaren eta antolaketaren kontua oso nahasia da, eta orain badakite hilabetean behin aukera hori dutela», dio Zalduak. Horrela, gurasoentzat oso positiboa dela dio Elorzak: «Haurrentzako garrantzitsua den arren, gurasoek bereziki asko baloratzen duten zerbait dela diote: «Gurasoak oso eroso egoten dira, eta asko eskertzen digute egiten dugun edozer. Langileak jarri behar ditugu, taberna ireki… eta beraiek konturatzen dira esfortzu hortaz»», azaldu du Elorzak. Bide beretik jo du Zalduak: «Zu zinematik atera eta ez dituzu eskerrak ematen, eta beraiek uneoro ari dira eskertzen, badakitelako guretzako esfortzu bat dela, eta beraientzat erraztasun guztiak dituzte», dio Zalduak.
Zinemara joan aurretik, Gautenakoek eta familiek haurrekin gaia lantzen dutela dio Zalduak, nora joango diren jakin dezaten. Azken batean, proba baten modukoa dela diote, ongi portatzen ikas dezaten, eta helburua saio komertzial arruntetara joatea da. Hala, familia asko denak elkarrekin joaten dira Antiguara, familiako plan gisa: «Gurasoen lana oso garrantzitsua, umeei irakatsi behar baitiete nola portatu behar diren».
Egokitzapenak egiten dituzte saioetarako: ehun lagunentzako aretoak izaten dira, eta gehienez 80 eserleku betetzen dituzte; aretoa betetzen bada, beste areto bat gehitzeko aukera dute; aretoko argia igotzen dute; filmaren bolumena baxuagoa izaten da hasieran, eta pixkanaka igotzen joaten dira; ateak beti zabalik izaten dituzte, batzuk sartu eta atera ibiltzen baitira; ulerterrazak izaten dira aukeratutako filmak, eta ezin dira ordu eta erdi baino luzeagoak izan. «Ez dago portaera araurik, haurrak aurrera eta atzera ibiltzen dira. Gainera, beraientzat egokitutako saioa da, baina irekia da, edonor sar daiteke, helburua integrazioa delako», azaldu du Zalduak. Lankidearen hitzak berretsi ditu Elorzak: «Hori da, gurasoekin hitz egin genuen eta horrela nahi zuten, inklusiboa. Saio horretara joaten den edonork badaki saio berezi bat izango dela, beraz, inork ezin du ezer esan pelikularen erdian norbait altxatzen bada, joaten bada edo oihuka hasten bada, berezitasun hori duelako».
Ez dago portaera araurik Besaulki urdina programazioko zinema saioetan. (Argazkia: SADE)
Hurrengoa, igandean
Gautenaz gain, Atzegin ere zabaltzen ari dira orain informazioa, eta gero eta gehiago zabaltzea espero dute. «Pentsatzen dugu gero eta jende gehiago hurbilduko dela, baina gure helburua ez da dirua irabaztea. Gurasoek nola eskertzen duten ikusita, merezi duela ikusten duzu», dio pozik Elorzak. «Gurasoek diote eskaintza kulturaletan ez dutela lasai egoteko giro hori. Guraso batzuek, adibidez, esan ziguten zazpi urteko euren haurrarekin lehen aldiz joan zirela zinemara aurrekoan, sekula ez zirelako hausartu, eta hori bai dela harrrigarria», dio Zalduak. SADEko langileak oso pozik daude hartutako erabakiarekin:?«Halako jendearekin lan egitea zoragarria da, oso ohituak daude elkarlanean aritzera, asko mugitzen dira», dio Zalduak. Orain arte bi saio eskaini dituzte, Antiguo Berri zinemetan: otsailean, Cavernicola, eta martxoan, El hijo de Big Foot. Besaulki urdinaren hurrengo saioa igandean izango da, hilaren 22an, 11:30ean. Campeones emango dute, eta sarreraren prezioa 6,2 eurokoa izango da.
