Iñigo Urkullu lehendakariak Donostiako topoaren eraikitze lanak bisitatu ditu

Iñaki Agirre

2018/05/04

Arantxa Tapia sailburua, Iñigo Urkullu lehendakaria eta Eneko Goia Donostiako alkatea gaurko prentsaurrekoan. (Argazkia: Iñaki Agirre)

Iñigo Urkullu lehendakaria eta Arantxa Tapia Azpiegitura sailburua Donostian izan dira gaur hiriko topoaren eraikitze proiektua gertutik ezagutzeko. Eneko Goia alkateak Easo plazako geltokian egin die harrera, bertara garraio publikoan iritsi direnean. Lehendakari zein alkateak, topoaren luzatze proiektuak hiriarentzako aldaketa handia suposatuko duela nabarmendu dute elkarrekin eskainitako prentsaurrekoan. “Donostiak etorkizunean izango duen aldaketarik garrantzitsuena” izango dela adierazi du Goiak Easoko geltoki barnean. Hain zuzen, proiektuak geltoki horren desagertzea suposatuko duela jakinarazi du ere alkateak, “helburu on batengatik” izango dela adieraziz. Urkulluk, bere aldetik, topoaren proiektua Eusko Jaurlaritzak hirian duen inbertsio handiena dela gogoratu du bere hitzartzean, eta Donostiaren garapenerako, gizartearen ekitaterako eta lehiakortasuna hobetzeko “funtsezkoa” izango dela adierazi du. Lehendakariarekin batera, bertan izan dira ere Imanol Leza, Euskotreneko zuzendari nagusia, Aitor Garitano, Euskal Trenbide Sareko zuzendaria eta Mikel Gurutzeaga, Eusko Jaurlaritzako Garraio Azpiegituretako zuzendaria. Politikariek geltoki barruan prentsaurrekoa eskaintzen zuten bitartean, topoaren igarobidearen aurka bildutako hainbat hiritarrek protesta egin dute eraikinaren kanpoaldean, Satorralaia elkarteak deituta.

Azken bideoak