Realak liga irabazteko play offa jokatuko du

Iñaki Agirre

2018/05/14

Realeko hockey taldeko neskek era ezin hobean amaitu zuten ligako lehen fasea, azken jardunaldiko garaipenarekin kategoria mantendu eta liga titulua irabazteko play offetara sailkatzea lortuz. Donostiako Atletikok, aldiz, beste behin galdu eta kategoriaz jaitsi da, denboraldia sailkapeneko azken postuan amaituta. Futbolean, Realeko neskek ezin izan zuten Athleticen aurkako neurketan garaipena lortu, baina kopa postua berdin mantendu ahal izan zuten jardunaldiko beste emaitzei esker. Mutilek, berriz, garaipen polita lortu zuten Xabi Prieto eta Carlos Martinez jokalarien agurrean. Eskubaloian, Bera Berak pausu garrantzitsua eman zuen liga titulua irabazteko bidean, bigarren sailkatuari bi puntuko diferentzia ateratzea lortu baitzuen larunbatean, txapelketa amaitzeko bi partida gelditzen zaizkielarik. Saskibaloian, azkenik, Gipuzkoa Basketek ezin izan zuen Andorrako bisitan garaipena lortu. FUTBOLA Emakumeen lehen maila, 30. jardunaldia

Reala 1 – 4 Athletic

Gizonezkoen lehen maila, 37. jardunaldia

Reala 3 – 2 Leganes

ESKUBALOIA Emakumezkoen Ohorezko maila, 24. jardunaldia

Valentzia 26 – 27 Bera Bera

HOCKEYA Emakumeen Ohorezko maila, 18. jardunaldia

Reala 2 – 0 Terrasa

Gizonezkoen Ohorezko maila, 18. jardunaldia

Donostiako Atletiko 1 – 3 Junior

SASKIBALOIA ACB liga, 32. jardunaldia

Andorra 94 – 81 Gipuzkoa Basket