Espartxoko egungo zubia, Txomin Enean.
Aldi baterako elkartu dira Construcciones Amenabar eta Campezo Obras y Servicios enpresak, eta haiek egingo dute Txomin Eneako Espartxoko zubi berria. Udalak erabakia hartu du Urumeako ibaiertzean uholdeak saihesteko proiektuaren baitan. 2,2 milioi euroko aurrekontua aurreikusi dute proiektua egin ahal izateko, eta zubia bukatua egon beharko da hasi eta 14 hilabeteko epean.
Zubi berriaren neurriak hauek izango dira: 60 metro luze eta 18 metro zabal. Gainera, Espartxoko zubi berriak bereizita izango ditu errepidea eta espaloia, eta Martutenetik gertuen dagoen aldean bidegorria izango du. “Zubiak ez du zutaberik izango ibaiaren bidean. Beraz, ura oztoporik gabe igaroko da”, azaldu du Eneko Goia alkateak.
Zubi berria zaharraren ondoan eraikiko dute, eta behin berria bukatzean botako dute zaharra; horrela, lanak iraun bitartean, alde batetik bestera igarotzeko aukera egongo da.
Astiñene eta Urdintzu
Urumeako hobekuntza planarekin bukatzeko, beste bi zubi berri egin beharko lituzte udalak: Astiñeneko zubia eta Urdintzuko zubia. Astiñeneko zubia Loiola eta Egia artean dago, eta momentu honetan itxia dago, konponketak egin bitartean. Goiak esan du, ondo bidean, ekaina bukaerarako irekiko dutela Astiñene. Ondoren, Astiñeneko zubi berriaren proiektua gauzatzea etorriko litzateke, onartua baitago. Urdintzuko zubiarekin, berriz, arazoa handiagoa da. Izan ere,
loiolatarrek maiz aldarrikatu dute zubi zibila dela, baina alkateak esan du militarren jabetzakoa dela. Kontuak hala, udalak momentuz ezin duela eskua sartu dirudi.
