Hirian bizitzeko eskubidea aldarrikatu dute turistifikazioaren aurkako manifestazioan

Iñaki Agirre

2018/05/25

Argazkia: Iñaki Agirre

Hainbat pertsona kalera irten dira Donostiak bizi duen turistifikazio prozesua salatu eta hiritarrek bertan bizitzeko duten eskubidea aldarrikatzeko. Manifestazioa 18:30ean abiatu da Saguesetik, Bertan bizi gara, bertan bizi nahi dugu! lelopean, Bizilagunekin plataformak deiturik. “Turismoak hiltzen gaitu” eta “Donostia ez dago salgai” bezalako oihuak bota dituzte protestan zehar, besteak beste. Musikaz eta zanpantzar erraldoi batez lagundurik egin dute Bulebarrerako ibilbidea. Udaletxe parera iristean, manifestariak Parte Zaharrean barrena sartu dira Kale Nagusitik. Santa Maria elizaren aurreann Hotel bat + ez! taldeko kideek ‘auzo bizia’ aldarrikatzeko pankarta bota dute tenplu pareko eraikineko fatxadatik, jendearen txalo artean. Bulebarrerako bueltan, Bizilagunekineko kideek hitzaldia egin dute kiosko aurrean.