Gipuzkoako emakumeen saskibaloia indartu nahi dute

Estitxu Zabala

2018/05/25

Azu Muguruza entrenatzailea, jokalari batzuekin, proiektu berriaren aurkezpenean. (Argazkia: Ibaeta Basket)

Gipuzkoako emakumezkoen saskibaloian erreferentea da IDK Gipuzkoa taldea, eta lanean ari da gehiago indartzeko Gipuzkoako emakumeen saskibaloia. Goi mailan dabil azken urteetan taldea, eta denboraldi polita osatu du, lorpen handiekin, eta hazten jarraitzeko asmoa dute. Jada datorren denboraldiari begira lanean ari dira, eta horrela aurkeztu dituzte webgune berria eta irudi korporatibo berria. Orain taldearen izena hau izango da: IBAETA BASKET. Horrela, keinua egin nahi diote bere sorkuntzari, unibertsitate garaiei, 2005ean sortu zeneko izena berreskuratuz: “Euskal Herriko Unibertsitatea dagoen Ibaeta auzoak garrantzia hartuko du”.

Ibaeta Kirol Balioak eta Ibaeta Eskola

Berrikuntzekin jarraituz, 2018-2019 denboraldian iritsiko dira Ibaeta Kirol Balioak eta Ibaeta Eskola. Ibaeta Kirol Balioak proiektuaren barnean, ikastetxeetara joango dira klubeko ordezkariak, ikasleekin partekatzeko kirolean ikasi eta barneratzen diren balioak. Bisita horietarako prestatuko dute proiekzio bat. Ibaeta Eskolaren bidez, berriz, hutsune bat bete nahi dute, gipuzkoar nesken artean zegoen beharrari erantzunez. Eskolekin harremanetan jarriko dira eta lagunduko diete entrenatzaileen hazkundean eta entrenamenduen metodoetan.

Azken bideoak