Zinema jaialdiak itxura grafikoa berritu zuen maiatza hasieran, bere logoan SSIFF siglak nabarmenduz. Udalbatzak, berriz ‘Donostia Zinemaldia’ marka zabaltzea onartu berri du.
Jose Luis Rebordinos Zinemaldiko zuzendaria eta Ruth Perez zuzendaritzako kidea, itxura grafiko berriaren aurkezpen ekitaldian. (Argazkia: Pablo Gomez)
Donostia Zinemaldiak aire guztiz berrituarekin beteko ditu aurten bere 66 urteak. Izan ere, zinema jaialdiak bere itxura grafikoa nabarmenki eraldatu zuen maiatza hasieran, bere ikur bilakatu den maskorra «sendotasun bisual handiagoko» beste batekin ordezkatuz. Hala azaldu zuten itxuraldaketaz arduratu den TGA estudioko adituek. Maskorrari buruz gutxik hitz egin dute, ordea, azken asteotan. Behealdean ageri diren SSIFF siglek (San Sebastian International Film Festival) ardaztu baitute itxuraldaketaren inguruko eztabaida.
Jaialdiaren imagotipoan (irudia eta izena, baturik) sigla horiek nabarmentzearekin euskararen erabilera baztertu eta ingelesarekiko apustu osoa egin dela uste dutenak ez dira falta. Gai horren harira, maiatzeko udalbatzarrean ‘Donostia Zinemaldia’ marka zabaldu eta ezagutarazteko EH?Bilduk aurkeztutako mozioaren alde agertu ziren udaleko alderdi guztietako zinegotziak, zinema jaialdiak euskararen eta euskal kulturaren hedapenaren alde egiten duen lana babesteko helburuarekin.
Jaialdiaren itxuraldaketaren inguruan «nahaste handiak» egon direla uste du Maialen Beloki Zinemaldiko zuzendariordeak. Jaialdiaren izenak ‘Donostia Zinemaldia-Festival de San Sebastian’ izaten jarraituko duela argitu du berak, eta gaizki ulertuaren ardura jaialdiaren gain hartu du: «aldaketak zeintzuk izan diren ez dugu ongi azaldu».
Zinemaldiaren itxuraldatzearen proiektua buruan aspalditik zutela azaldu du Belokik, maskorraren irudi zaharrak ikusgarritasun gabeziak zituela argudiatuz. Jaialditik «irudi gazte eta dinamikoago bat» sortu nahi zutela dio zuzendariordeak. SSIFF siglei dagokienez, ordea, nazioartekotasuna bultzatzea bilatu dutela zehaztu du Belokik: «Hemendik kanpo jendeak ez du Zinemaldia izen horrez ezagutzen. Nazioartean ‘San Sebastian’ izena erabiltzen dute».
Hala ere, euskara nazioarteratzea garrantzitsutzat jotzen dutela dio jaialdiaren zuzendariordeak: «Badakigu Zinemaldiaren gisako plataformek euskara munduak zabaltzen laguntzen dutela, eta ez dugu hori aldatu nahi».
Zinemaldiaren zuzendaritzak SSIFF?siglak nabarmentzeak sortu dituen kezkak erabat ulertzen dituela azaldu du ere Belokik: «guk erabakiak hartzen ditugu hori tokatzen zaigulako, baina iritzi desberdinak eta kritikak ongi etorriak dira beti». Zentzu horretan, Zinemaldia donostiar guztiena dela eta gaiaren inguruko eztabaida osasuntsua dela azpimarratu du jaialdiaren zuzendariordeak.
Ikuspuntu desberdinak
Udalbatzako zinegotzi guztiek ‘Donostia Zinemaldia’ marka bultzatzearen aldeko mozioa onartu bazuten ere (Ernesto?Gasko PSE-EEko zinegotziak ez zuen bozketan parte hartu nahi izan), gaiaren inguruan alderdiek iritzi desberdinak dituztela ziurtatu ahal izan du Irutxuloko Hitzak.
Mozioa EH?Bilduk aurkeztu zuen Amaia Almirallen eskutik. Gaia garrantzi handikoa dela uste du zinegotziak, zinema jaialdia «erakusleiho ikaragarria» delako eta bertan egiten den orok «dimentsio itzela» hartzen duelako, «onerako zein txarrerako».
Jaialdiaren izena ofizialki aldatu ez dela badakite, baina «udaleko hizkuntza irizpide guztiak galduta» Zinemaldiak SSIFF markaren aldeko apustu garbia egin duela salatzen dute EH Bilduko kideek.
Zinema jaialdiek «tokikotasunari bide eman» behar diotela uste du Almirallek, Berlinale (Berlin, Alemania) edo Mostra (Venezia, Italia) jaialdiak eredu positibo gisa joaz. Ekitaldi hauek «nazioartean identifikazio propioa izateko aukera paregabea» direla adierazi du zinegotziak.
Zinemaldiaren erabakiarekin, «munduan kokatzen gaituen berezitasunari» heldu ordez, «nortasuna galtzen» ari dela adierazi du Almirallek. Bere hitzetan, «urtero urrutitik datozen zinema izarrek jaialditik azaldu dena baino errespetu eta miresmen gehiago diote euskarari».
Irabazi Donostiak, bere aldetik, sigla berriekin festibalak bere izenari uko egin diola uste du. Erabakia «ulergaitza» iruditu zaiela azaldu du Amaia Martin zinegotziak, ‘Donostia Zinemaldia’ izena mantentzea euskara eta hiriaren kulturaren alde apustu egitea dela azpimarratuz.
Mozioarekin bat egin bazuten ere, PPko zinegotziek ez dute horren iritzi gogorra agertu gaiaren inguruan. Miren Albistur zinegotziak Zinemaldiko arduradunek «euren zergatiak» izango zituztela uste du, eta jaialdiaren erabakietan sartzeko asmorik ez dutela azpimarratu du.
Zentzu horretan mintzatu da ere Jon Insausti Kulturako zinegotzia (EAJ), Zinemaldiak bere «nortasun propioa» duela eta «era autonomoan» funtzionatzen duela nabarmenduz.
Festibalaren arduradunek «nazioartera begira» eta euren «eguneroko zailtasunei aurre egiteko» ingelesezko terminoa indartzea egokia dela iruditzen zaio EAJko kideari. Garrantzitsuena jaialdiak bere izen ofiziala mantentzea dela uste du Insaustik. Mozioa ‘Donostia Zinemaldia’ izena «behar den lekuetan sustatzearen alde» daudelako onartu zutela azaldu du zinegotziak, FITUR?Espainiako nazioarteko turismo azoka adibide bezala jarriz: «Nazioartera begira ulertzen dugu ingelesa erabiltzea. Etxera begira, aldiz, euskarazko izena mantentzea koherenteagoa iruditzen zaigu».
