Txapeldunak, Altzako pilotalekuan. (Argazkia: Gipuzkoako Pilota Federazioa)
Pozik daude Donostiako pilotariak, eta ez da gutxiagorako. Izan ere, txapela jantzi dute Gipuzkoako Herriarteko Gomazko Paleta Txapelketan. Lehen aldiz antolatu dute modalitate hori Herriartekoan, eta donostiarrek estreinatu dute palmaresa. Hamasei herri aritu dira txapelketan, eta Azpeitia eta Donostia iritsi ziren ekainaren 24ko finalera. Pilotarien iritziak jaso ditugu bizitako esperientziaren inguruan.
Unai Arostegik oso irakurketa baikorra egin du: «Txapelketa ederra izan da eta maila handikoa. Txapelketa oso ona egin dugu bai titular aritu garenok bai ordezkoek ere. Ea datorren urtean errepikatzeko aukera dugun». Formatua ere asko gustatu zaie:?«Oso dibertigarria izan da eta partida mota bakoitzak bere bereizgarriak izan ditu. Etxekoak, familiakoak eta lagunak hurbildu zaizkigu, eta denak animatzen aritu dira».
Xabier Elejalderen ustez indartsu abiatu da txapelketa: «Herri asko aritu gara lehenengo urtea izateko. Indartsuenak Hernani, Azpeitia eta Azkoitia izan dira, eta gu faboritoak ginela uste dut. Hala ere, partida zailak izan ditugu. Egia esan, modalitate honek gero eta indar gehiago du bai Gipuzkoan bai gainontzeko probintzietan ere. Pena izan da aurten emakumerik ez aritzea, ea datorren urtean animatzen diren federazioaren bultzadarekin». Elejalderi ere gustatu zaio formatua: «Federazioko Iñaki Peluagak proposatu zuen modalitatea sartzea, eta pilotariok babesa eman genion. Datorren urteari begira ziur pilotari gehiago bilduko garela eta maila mailak gora egingo du». Donostiako taldea osatu duten pilotariak ezagutzen aurretik: «Txapelketa guztietan berberak mugitzen gara, eta sekulako giroa izan dugu oraingoan ere».
Elejaldek azaldu duenez, hiru ordu inguru iraun dute jardunaldiek, batezbeste: «Partidak 20 tantora izan dira, normalean 25era izaten diren arren. Buruz burukoan, azkarragoak izan dira tantoak; binakakoan, bikoteak berdinduak bazeuden, 40 minutu ingurukoak izan dira partidak;?azkenekoan, 7aren barruan egotean, txikitu egiten zen frontoia, baina zailagoa zen tantoak egitea, eta partidak luzatu egin dira».
Altzan jokatu zuten finala, eta Azpeitiari 1-2 mendea hartu zion Donostiak. Pilotari hauek ordezkatu zuten Donostia finalean: Gastesi, Urbieta, Peluaga, Barbulo, eta Elejalde. Finaleko emaitzak hauek izan ziren: buruz burukoa, frontoi osoan: Azpeitia (Lopetegi) 20 / Donostia (Urbieta) 17;binaka: Azpeitia (Martija-Alkorta) 9 / Donostia (Barbulo-Gastesi) 20; buruz burukoa, 7aren barruan: Azpeitia (Egiguren) 13 / Donostia (Elejalde) 20. Finalean borrokatu egin behar izan zutela dio Elejaldek: «Azken partida jokatu nuen nik eta bagenekien gogorra izango zela. Ordura arte berdinduak ginen eta partida hura irabazten zuenarentzat izango zen txapela. Landuta lortu genuen irabaztea, baina ez zen erraza izan». Sekulako giroa izan zutela dio Elejaldek: «Azpeitiatik autobus bat betea ekarri zuten, eta Donostiatik ere jende asko mugitu zen. Frontoia bete egin zen».
Gainontzean, Gipuzkoako Txapelketa jokatzen dute urtero, federazioak antolatutakoa, kluben artekoa izaten da, eta normalean, binakakoa. Horretaz gain, txapelketa pribatuak ere jokatzen dituzte hainbat herritan, eta gehienetan binakakoak, baina izaten dituzte buruz burukoak ere.
Elejalde esku pilotan ibiltzen zen lehen, eta Herriartekoetan modalitate horretan parte hartzen zuen: «Esku pilotaren munduan giro oso ona genuen, baina palak ere mugitzen du jendea». Gaur egun, Alde Zaharra elkartean eta Realaren pala sailean aritzen da entrenatzaile gisa: «Federazioarekin batera lanean ari gara Donostian pilota sustatzeko. 27 pilotari dauzkagu Realeko eskolan, eta 20 urtetik aurrera klubetara bideratzea da asmoa. Momentu honetan neskak oso gutxi daude 14-20 urte artekoetan. Badago talde bat 25 urtetik gorakoa, eta pixkanaka indartzen ari gara».
Ategorrietan ere bai
Ategorrietan ere pala txapelketa jokatu berri dute, eta 44 pilotarik hartu dute parte. Auzoko frontoian jokatu dituzte partidak. Lehen mailan txapeldunak izan dira Gillen Martinez de la Hidalga eta Iñigo Navarro; bigarren lekuan geratu dira Imanol Otegi eta Angel Larralde. Bigarren mailan, berriz, Gorka Nuin eta Manu Ferreiro bikoteak jantzi du txapela, eta haien atzetik geratu dira Josu Iparragirre eta Luis Miguel Bautista.
Emakumeek aukera izango dute abuztuan, izan ere, emakumeen pala txapelketa egingo dute, teniseko pilotarekin, Trinitate plazako frontoian. Idatz daiteke xabielejalde@gmail.com posta elektronikora izena emateko.
