Hotel gehiagoren irekieraren aurkako manifestazioa egin dute Parte Zaharrean

Iñaki Agirre

2018/07/26

Argazkia: Irati Salsamendi

Hotel + ez taldeak deituriko manifestazioak Parte Zaharreko kaleak hartu zituen atzo arratsaldean hiriaren turistifikazioa salatu eta hotel gehiagoren irekieraren kontra agertzeko. Goizean udaltzaingoak Kale Nagusiko etxebizitza okupatu bat desalojatu zuen, laster hotel berri baten kokapena izango den eraikinean. Gertakari horrek turistifikazioak auzoa eta hiria nola hiltzen dituen islatzen duela salatu zuten atzo protestara batu ziren herritarrek. Manifestazioa hustutako etxebizitzaren eraikinaren ondotik pasa zenean tentsioak gora egin zuen jendearen artean, txistu eta oihu geroz eta ozenagoekin. Ondoren, Trinitate plazan, Hotel + ez taldeko kideek hitza hartu zuten Jazzaldiak auzotarren plaza bereganatu zuela salatzeko. Hain zuzen, plazan zegoen mural herritar bat jazz festibalaren babeslearen publizitatea jartzeko estali zutela ikustarazi nahi izan zuten. Manifestazioa Santa Maria eliza parera bueltatu zen ondoren, azken hitzartze batekin amaitzeko.

Kale Nagusiko etxebizitzaren desalojoaren eta hotel gehiagoren irekieraren kontrako manifestazioa abiatu da Konstituzio plazatik @irutxulo pic.twitter.com/KlOolUIBKW
— Iñaki Agirre (@ikiagirre) July 25, 2018

"Gure auzoa ez dago salgai!" diote oihuka Hotel + ez taldeak deituriko manifestazioan @irutxulo pic.twitter.com/M2mBMGiwQj
— Iñaki Agirre (@ikiagirre) July 25, 2018

Manifestazioa goizean poliziak hustu duen etxebizitzaren eraikinera iritsi da. Bertan geratu dira, "Turismoak auzoa hiltzen du!" oihukatuz. Eraikin horretan hotel berri bat eraikitzeko proiektua dago @irutxulo pic.twitter.com/IONeD59eJ7
— Iñaki Agirre (@ikiagirre) July 25, 2018

"AUZO BARATZA BIZIRIK" zioen murala estali dute Trinitate plazan, Jazzaldiaren babeslearen publizitatearekin @irutxulo pic.twitter.com/4SjSgE7wSY
— Iñaki Agirre (@ikiagirre) July 25, 2018