San Juan eta Zierbenak egin dituzte denbora onenak

Irutxuloko Hitza

2018/09/02

Arraun Lagunakeko arraunlariak, kaira iristen. (Argazkia: Irati Salsamendi)

San Juan izan da, emakumezkoen txapelketan, Kontxako Banderako lehen jardunaldiko talderik azkarrena. Lehen txandan erregistratu dira denborarik honenak: San Juan (10:41), Riveira (10:47), Orio (10:49) eta Donostiarra (11:06). Bigarren txandan, Arraun izan da azkarrena, 10:55eko denborarekin, eta jarraian izan ditu Hibaika (11:01), Kaiku (11:06) eta Tolosaldea (11:15). Beraz, Kontxako Banderako bigarren jardunaldian, datorren igandean, hain zuzen, San Juan, Riveira, Orio eta Arraun arituko dira. Emakumezkoen lehen jardunaldiko sailkapena: 1. San Juan (10:41,66) 2. Riveira (10:47,76) 3. Orio (10:48,86) 4. Arraun Lagunak (10:55,40) 5. Hibaika (11:01,42) 6. Donostiarra (11:06,66) 7. Kaiku (11:06,76) 8. Tolosaldea (11:15,66) Gizonezkoen estropada, aldiz, polemikoa izan da, traineruen kale aldaketengatik. Lehen txandan, Orioren kale aldaketa oharkabean pasa da, baina bigarrenean, Urdaibai eta Zierbenaren arteko lehia biziak, bi taldeen arraunen arteko talka eragin du. Epaileek, egoera aztertu ostean eta araudiaren 64. artikulua oinarri hartuta, Urdaibai zigortzea erabaki dute, abordaia egiteagatik. Traineru guztien denbora okerrenari 15 segundu gehitu eta 20:15eko denbora ezarri diete. Horrela, bizkaitarrak, lehen txandan aterako dira datorren igandean, Orio, San Pedro eta Donostiarrarekin batera. Lehen txandan, Hondarribiak tarte ederra atera die hasieratik gainerako taldeei. Oriokoek, iazko irabazleek, ezin izan diote eutsi bere mailari, eta Cabo eta San Pedrokoekin batera, atzean gelditu dira. Bigarren txandak zirrara handiagoa piztu du ikusleengan, Zierbena eta Urdaibairen arteko lehia biziagatik. Azkenik, Zierbenakoek Hondarribiakoen denbora hobetzea lortu dute, 19:26ko denbora eginez. Hortaz, Kontxako Banderako bigarren igandean, Zierbena, Hondarribia, Santurtzi eta Cabok jokatuko dute ohorezko txanda. Gizonezkoen lehen jardunaldiko sailkapena: 1. Zierbena (19:26,20) 2. Hondarribia (19:27,06) 3. Santurtzi (19:41,32) 4. Cabo (19:43,22) 5. Orio (19:47,16) 6. Donostiarra (19:59,18) 7. San Pedro (20:00,64) 8. Urdaibai (20:15,64)