Emakumeentzako paleta ikastaroa egingo dute Atano III.a pilotalekuan

Irutxuloko Hitza

2018/09/13

Emakumea Pilotari programako paleta ikastaroko saio bat. (Argazkia: Gipuzkoako Euskal Pilota Federazioa)

Urtero legez, paletan jokatzen ikasteko eta trebatzeko ikastaroa egingo dute Atano III.a pilotalekuan. 18 urtetik gorako emakumeei zuzenduta egongo dira saioak eta urritik ekainera bitarte izango dira, astelehen arratsaldetan. Gipuzkoako Euskal Pilota Federazioak, Emakumea Pilotari proiektuaren barruan antolatutako egitasmoa da eta irailaren 25era arte eman ahalko da izena, federazioan bertan (Portuetxe 23 A, CEMEI – 306 bulegoa) edo etxebe.pilota@kirolak.net helbide elektronikoan. Hona hemen ikastaroari buruzko xehetasunak: IRAUPENA

Urriko bigarren hamabostaldian hasi eta ekaineko lehendabiziko hamabostaldian bukatuko da.
Ikasturtean, 30 bat saio izango dira.
Eguberrietan eta Aste Santuan ez da saiorik izango.

ORDUTEGIA

Astean ordubeteko saio bat, Atano III.a pilotalekuan.
Astelehenetan izango dira saioak, eta bi aukera egongo dira: 16:00etatik 17:00etara eta 17:00etatik 18:00etara.
Ikastaroa antolatzeko gutxieneko ikasle kopurua 6 lagunekoa izango da eta, gehienez, 10ekoa.

MATERIALA

Gipuzkoako Euskal Pilota Federazioko teknikari batek zuzenduko ditu saioak.
Federazioak beharrezko materiala jarriko du, paletak eta pilotak (teniseko pilotak), besteak beste.

KUOTA

140 euro (ordainketa batean, edo bi zatitan ordaintzeko aukera egongo da).

BESTEAK

Paletako Gipuzkoako Txapelketa Herrikoian parte hartzeko aukera.
Emakumea Pilotari Txartela: istripu asegurua eta erantzukizun zibileko asegurua eskaintzen ditu, urtarrilaren 1etik abenduaren 31ra. Era berean, GEPFk antolatzen dituen Emakumea Pilotari egitasmoko hainbat ekintzetan doako izen-ematea ahalbidetzen du, hala nola, Emakumea Pilotari Txapelketa Azkarra, ikastaro puntualak edo Emakume Pilotari Eguna.