Donostiak "Kaixo, Anoeta" esan zuen
(Argazkia: Kutxateka) 
(Argazkia: Kutxateka)
Realak irailean jokatu berri du lehen partida, oraindik obretan dagoen Anoeta berrituan. 1993ko uztailean inauguratu zuten estadioa, Atotxari agur esan ostean, eta etengabeak izan ziren zaleen kexak, atletismo pistek sortzen zuten hoztasunagatik.
Dagoeneko 25 urte igaro dira Realak Anoeta estreinatu zuenetik, 1993-1994 denboraldian. Aurretik, Realaren gizonen lehen taldeak Egiako Atotxa estadioa zuen etxea, eta aldaketaren berri emateko bi lelo zabaldu zituen klubak: Agur, Atotxa eta Kaixo, Anoeta. Materiala ere atera zuten lelo haiekin: motxilak, pinak… eta ilusioa zabaldu zen realzaleen artean.
Proiektua finantzatu zuten Udalak (17 milioi), Eusko Jaurlaritzak (12,7 milioi), Gipuzkoako Foru Aldundiak (10,6 milioi), Kirolen Goi Batzordeak (3,6 milioi) eta Realak (3 milioi). Klubak alokairu gisa hartu zuen estadioa, 40 urterako, eta diru gutxien hark jarri zuela eta, onartu behar izan zuen erakundeek agindutako atletismo pisten ezartzea, goi mailako atletismo probak non jokatu egon zedin Euskal Autonomi Erkidegoan.
(Argazkia: Kutxateka)
Estadio handi baten ametsa zabaldu zen, futbolak eta atletismoak bat egingo zuten agertokia. Horrela, 29.000 lagunentzako lekua zuen estadioa eraiki zuten, Atotxan baino 2.000 gehiago. Estadioa eraikitzeko lanak 1990ean hasi zituzten, 47 milioi euroko aurrekontuarekin, eta 1993ko uztailaren 29an inaugurazioa egin zuten, Atletismoko Europako Junior Txapelketa egiteko. Inaugurazio ekitaldi hartan aritu ziren zuzenean Oskorri, Javier Gurrutxaga eta Mondragon orkestra, eta Luz Casal musikaria. Edonola, inaugurazio ofiziala urte hartako abuztuaren 13an egin zuten, Kaixo Anoeta izeneko ekitaldian. Lagunartekoa jokatu zuten Realak eta Real Madrilek, eta bina berdinduta bukatu zuten. Lorenzo Juarros Loren jokalari txuri-urdina izan zen estadioan lehen gola sartu zuen futbolaria.
Zaleengan frustrazioa sentimendua zabaldu zen. Izan ere, atletismo pistek urrundu egin zuten jarraitzaileen eta futbolarien arteko distantzia. Segituan hasi ziren Atotxan zegoen gertutasun hori faltan botatzen. Mitikoak dira Odon Elorza alkateari pistak kentzeko eskatzen zioten oihu haiek. Izan ere, atletismo pisten erabilera urria izan zen beti ere, hasieran esan zenaren aurka.
1998an iparreko eta hegoko hondoak handitzeari ekin zioten, tarteko oin bat eraikiz. Horrela, edukiera 32.076 eserlekukoa izatera igaro zen.
Anoeta agertokia izan da Reala bigarren mailan aritu zenean, eta jokatu ditu Txapeldunen Ligako eta UEFAko partidak ere. Horretaz gain, euskal selekzioak ere jokatu du Anoetan, eta aurtengo maiatzean, lehen aldiz, emakumeen ligako Reala eta Athleticen arteko derbia jokatu zuten berdegune horretan, zaleen aldetik sekulako erantzunarekin. Kontzertu askoren lekuko ere izan da Anoeta. Lehen kontzertua 1994ko uztailaren 25ean eskaini zuen Pink Floyd rock talde ingelesak. Gerora igaro dira: U2, The Rolling Stones, Bruce Springsteen eta Bon Jovi. Horretaz gain, Anoetan egin dira Bakearen kontzertua (1995eko ekainean), Donostiako Orfeoiaren Ehungarren Urteurrenaren ospakizuna (1997ko abuztuan), eta Bai Euskarari ekitaldia (1998ko abenduan).
Edonola, Atotxa oraindik askoren buruan dago, maitasun handiz. 1913ko urriaren 4an inauguratu zuten estadio hura, Athleticen aurkako partida batekin. Hau da, atzo 105 urte bete ziren lehia hartatik; hiruna goleko markagailuarekin bukatu zena. Realeko Oceano Andrade izan zen partida ofizial batean gol bat sartu zuen azkena, 1993ko ekainean. Teneriferen aurkako ligako jardunaldian, eta 3 eta 1ekoarekin. Hala ere, agur gisa, urte hartako ekainaren 22an, Reala eta euskal selekzioaren arteko norgehiagoka bat jokatu zuten. Jada Anoetan eraikita zegoela, 1999ko maiatzaren 28an hasi zituzten Atotxaren eraiste lanak.
Anoeta berritua
(Argazkia: Kutxateka)
2016ko abenduan jakinarazi zuen udalak Anoetaren eraldaketa lana gauzatzeko lizentzia onartu zutela. Lanei 2017ko martxoan ekin zieten, eta eraldaketa lanak etenik gabe burutzea erabaki zuten. Horrela bada, langileen lan baldintzen inguruan hainbat kexa egon dira, prekarietatea tarteko. Edonola, obra finantzatu dute Donostiako Udalak, Gipuzkoako Foru Aldundiak eta Realak.
2018ko Irailaren 15ean jokatu zuen lehen partida Realak Anoeta berrituan, oraindik lanak bukatu ez badira ere. Bartzelonaren kontra aritu zen, ligaren barnean, eta 1-2koa izan zen emaitza. Bartzelonari sufritzea egokitu zitzaion Anoetan, askotan bezala. Atsedenaldira abantailarekin joan ziren txuri-urdinak, 12. minutuan Aritz Elustondok sartutako golari esker. Bigarren zatian sartu zituzten bi golak bisitariek, Luis Suarezek lehenengo, eta Ousmane Dembelenek ondoren.
Anoeta berriak 42.000 lagunentzako edukiera izango zuela iragarri zuten, baina 38.500 eserleku izango ditu. Ondo bidean, 2019-2020 denboraldirako Anoeta berria guztiz bukatua egotea espero dute.
