Parte Zaharreko
Kijera gaztetxeko kideek literatura lehiaketa ez lehiakor bat antolatu dute datozen hilabeteetarako:
Literatur udazkena. Egitasmoa adin guztietako pertsonentzako da, eta abenduaren 2an egingo duten literatura topaketarekin amaituko dute.
Lehiaketan ipuinak, poemak, antzerki txikiak, iritzi artikuluak, marrazkiak, komikiak eta argazkiak aurkeztu ahal izango dira, eta jasotako lanek lau gai posibleetako bat jorratu beharko dute: eskola, Parte Zaharra, gaztetxea eta euskara. Lanak bi kategoriatan banatuko dira: haur eta gaztetxoena, batetik, eta gazte eta helduena, bestetik. Norberak adierazi beharko du zein kategoriatan parte hartu nahi duen, eta egileek
azaroaren 15era arte aurkeztu ahal izango dituzte euren lanak, gaztetxeko buzoian edo literaturudazkena@piperrak.cc helbidera idatziz. Ezinbestekoa da lana izenorde batekin sinatzea.
Abenduko topaketan jasotako lan guztiekin osatutako koadernoa aurkeztuko dute gaztetxean, eta obrak irakurriko dituzte hainbat gonbidaturen eskutik.
