Topoaren igarobidearen lanak salatzeko elkarretaratzea eta giza katea egingo du bihar Satorralaia bizilagunen mugimenduak.
Metroa gelditu, Donostia ez zulatu! lelopean Londres Hotelaren aurretik Xabier Zubiri plazara joango dira, 12:00etan.
Pasa den astean itxi zuten Xabier Zubiri plaza Erdialdea-Kontxa sarbidea egiteko.
Hiriaren eta Kontxako hondartzaren azpitik topoaren igarobidea eraikitzea “kalte handiak” eragingo dituela esan dute. Antiguan, Mirakontxan eta Amaran abiatu diren obra guneetan sortu diren “arazoak eta kalteak” areagotuko direla nabarmendu dute: “Xabier Zubiri Plaza, San Martin, Easo, San Bartolome eta Loiola kaleen okupazioa eta indusketa, zirkulazio karrilen eta espaloien mozketa, zarata, hauts eta gaien kutsadura eta abar”.
Era berean, Satorralaiak adierazi du lanek arriskuak eragingo dituztela Urbieta, Easo eta Arrasate kaleetan, eta Artzain Ona zein Easo plazetako eraikinetan.
