Izandako ausardia eskertu zion Lujanbiok Switzerri

Estitxu Zabala

2018/11/15

Maialen Lujanbio Kathrine Switzerri bertsotan, Deustuko unibertsitatean. (Argazkia: Deustuko unibertsitatea)

Deustuko unibertsitatearen ekitaldi batera gonbidatu zuten Kathrine Switzer, joan den astean. Maratoi batean dortsalarekin parte hartu zuen lehen emakumea izan zen Switzer, 1967an, Bostonen. Joan den asteburuan Donostian egon zen, Behobia-Donostia lasterketak gonbidatuta. Horrela, Kiroleko Baloreen Deustu Saria eman zioten Switzerri unibertsitatean, eta Maialen Lujanbiok bertso batzuk eskaini zizkion, esker gisa, bere garaian izandako ausardiarengatik. Jarraian irakur daitezke. Hara Kathrine gaztea gizon olde baten korrontearen baitan nola daramaten… Ez, ez, ez zeramaten, jakin zuen joaten ondoren zetozenek jarraitu zezaten

Lagun arteko kirol

edo eliteko,

garaia zen beldurrik

gabe ekiteko.

Bidea amaitu arte

egin, jakiteko

aurrera zenbat bide

dugun egiteko

Beldurrak sortzen duen geruza zurruna laster bihurtzen baita, korrika, lurruna. Eta korrika ez goaz ihesi urruna, gozatzen ari gara aurkitu duguna Maratoietan zenbat lehiakide batzen den helmuga baterantz oinak bideratzen… Nahiz bide berak denak berdin minberatzen, zuk egin zenuena beste bide bat zen Bostonen ta besteetan badira aleak oraindik munduaren antolatzaileak andreak bideetatik baztertu zaleak baina andre lasterkariz beteta kaleak 261 dortsala beltz eta zuri 261 ausardiaren irudi 261 bihotz taupada urduri 261 bider esateko guri badagoela aukera, egin daiteke ta mugi! ausartu, ahaldundu, saretu, korri, izerdia isuri! pausook izango dira geure bizitzarantz zubi 261 mila esker, Kathrine, zuri!