Datorren urteko maiatzaren 31n eta ekainaren 1 eta 2an izango da
Olatu Talka jaialdia. 2019an
hamar urte beteko ditu eta jaialdi ikusgarriago batekin ospatzeko aurrekontua handituko dute eta antolakuntza mailan aldaketa batzuk izango ditu.
Programazioa osatuko duten egitasmo eta jarduerak hautatzeko deialdi hirukoitza aurkeztu dute:
- Deialdi orokorra. Talentua erakutsi edo kultur-ekimen bat jaialdiaren azpiegitura eta babesean garatu nahi duten pertsona edo elkarteei zuzendutako deialdia.
- Kontxa Gaumarket deialdi berezia. Haien produktuak erakutsi edo saltzeko denda fisikorik ez duten sortzaileei zuzendutako deialdia. Kontxako arkupeetan, maiatzaren 31 eta ekainaren 1ean, guztira 80 merkatu-postu eskainiko dira.
- Kontzertour deialdi berezia. Edozein musika estiloko banda eta bakarlariei zuzendua, izen-ematen dutenen artean 25 kontzertu antolatuko dira Olatu Talkako eszenatokietan.
Deialdien inguruko informazioa Olatu Talkaren
webgunean egongo da eskuragarri. Proposamenak aurkezteko epea 2019ko urtarrilaren 31 arte egongo da irekita.
Jaialdi ikusgarriagoa
Urteurrena ospatzeko, ekoizpenerako aurrekontu gehiago izango du Olatu Talkak. Horrek jardueren azpiegitura eta guneen diseinuan zein ikusgarritasunean izango du eragina.
Leku jakin bati lotutako jarduerak kenduta, erdialdeko programazioa osatuko duten jarduera guztiak Eguzkiteka (Kontxako erlojuak) eta Aquariumaren arteko ibilbidean bilduko dira. Pasealekuan zehar agertoki, merkatu, karpa, erakusketa, lantegi edo gastronomiarako guneek etenik gabeko kultur-ibilbidea osatuko dute: Musika elektronikoa eta dantzarako gunea Eguzkitekan; Kontxako arkupeetan, berriz ere, Kontxa Gaumarket sortzaileen merkatu arrakastatsua; Kontzertour agertokiak Cervantes plazan, udaletxean eta portuan; arte plastikoen
gunea Alderdi Ederreko lorategietan; udaletxearen aurrean gune berezia ekitaldi bereziak eta formatu handiko emanaldiak hartzeko; eta, Dj terraza, atsedengunea, Food Truck-ak eta Kontzertour agertoki bat.
Donostiako auzoetan, eta Kultur Etxeen sareak koordinatuta, jaialdi monografikoak antolatzearen alde egin da apustua. Horrela, auzoetako guneetan, besteak beste, zientzia, familia jolasak, zinea edo kultur-aniztasunaren inguruko jarduera nagusiak gauzatuko dira.
Azkenik, 2019ko jaialdian esfortzu berezia egingo da diziplina desberdinetako artista plastikoen parte hartzea sustatu eta euren lana kalean bistaratzeko forma berriak lantzeko. Horretarako, gune nagusietako bat eskaintzeaz gain, hirian zehar hainbat mostra, erakusketa, lantegi eta jarduera egingo dira arte plastikoen inguruan.
