Kijera Gaztetxeko kideek euren proiektua "zilegia" dela azpimarratuz erantzun diote Goiari

Iñaki Agirre

2019/01/09

Ehunka herritarrek manifestazioa egin zuten ostiralean gaztetxearen alde. (Argazkia: Iñaki Agirre)

Asteartean Eneko Goia alkateak Parte Zaharreko Kaialde eraikinaren desalojo prozesuari buruz esandakoari erantzun diote Kijera Gaztetxeko kideek. Tokiko Gobernu Batzordearen osteko prentsaurrekoan, Goiak eraikina berreskuratzeko prozesua abian dagoela berretsi zuen, udala “legeak agintzen duena” egiten ari dela azpimarratuz. Ohar baten bidez, Kanpandegi kaleko eraikina okupatu duten gazteek auzoan dituzten beharrak nabarmenduz erantzun diote alkateari: “Jakin badakigu haien legeditik kanpo gaudela. Gure auzoaren egoera ikusita, eta bestelako moduetatik egiteko borondatez, eraikin hau okupatu genuen”. Legezkoa baino, euren proiektua “zilegia” dela zehaztu dute, eta zentzu horretan, “azken hamabi urteotan eraikina hutsik izan dutenek” auzotarren zilegitasunaz “ezer gutxi” esan dezaketela adierazi dute. Udaletxean eskainitako prentsaurrekoan, Goiak Parte Zaharrean Bizi elkartearekin auzoko beharrei buruz hitz egiteko prest zegoela esan zuen ere. Hori dela eta, gazteek azken hilabeteetan zehar udalarekin hitz egiteko egin dituzten saiakerak ekarri dituzte gogora: “Gurekin esertzeari uko egin zion alkate berdina da orain dialogoaren errege omen dena”. Jarraian Kijera Gaztetxeko kideek bidalitako oharra:

Pasa den ostiralean, mila pertsonatik gora mobilizatu ginen Donostiako kaleetan, udalak Parte Zaharreko Kijera Gaztetxea desalojatzeko duen asmoaren kontra. Parte zaharrean zehar argi adierazi genuen auzoak bizi duen proiektu bizi bat dela Gaztetxea. Kaialdeko eraikinetik auzokideak bota nahi gaituzte, gure auzotik bota nahi gaituztelako. Eta gaur, tokiko gobernu batzordearen osteko prentsaurrekoan, asmo horretan sakondu du Eneko Goiak. Auzo Elkarteak, udaleko gehiengo sindikalak, eta hamarnaka pertsonak gaztetxea ez desalojatzeko egin ditugun alegazio, mobilizazio eta eskutitzen aurrean, auzoko ekipamendu publikoez “hitz egiteko” prest dagoela adierazi du, eta gaztetxea desalojatuko dutela “ilegitimoa delako”. Hitz egiteko prest dagoela dio, une oro hitz egiten ari den horrek. Urtero propaganda berria saltzen digun alkateak, gero zehazten ez direnak. Gurekin esertzeari uko egin zion alkate berdina da, orain dialogoaren erregea omen dena. Gutxi balitz, gure proiektua “ilegitimoa” dela dio alkateak. Jakin badakigu haien legeditik kanpo gaudela. Gure auzoaren egoera ikusita, eta bestelako moduetatik egiteko borondatez, eraikin hau okupatu genuen. Zilegia da, ordea, gure proiektua. Parte zaharrean aurreko urteetan izan ez ditugun aisialdi guneak, haur jolaserako gune estaliak, antolakuntza eta komunitate erabilerak bermatzen dituen gaztetxea da Kijera. Proiektu legitimoa, aspaldidanik beharrezkoa dena. Azken 12 urteotan, eraikinerako proposatutako auzo erabileren kontra egin dutenek, hutsik izan dutenek, ezer gutxi esan dezakete auzotarron zilegitasunaz. Gauza bakarra daukagu, beraz, alkateari esateko: geratzen zaizkion lau hilabete hauetan, utz dezala Parte Zaharra bakean, utz gaitzala auzoaren alde lan egiten.

Kijera Gaztetxea