Omenaldiz betetako San Sebastian eguna ospatuko dute Amara Berrin
San Sebastian eguna ospatuko dute Amara Berriko 17 danborradek. Aurten, hainbat pertsona omenduko dituzte, besteak beste, Rosa Garcia, 2019ko Urrezko Danborraren irabazlea.
Amarakaldek elkarteak auzoko 17 danborraden estandarteak jarri ditu Armeria plazan. (Argazkia: Amarakaldek) 
Amara Berri, Amara Osinaga, Morlans eta Loiolako Erriberan irtengo diren danborradak batzen dituen Amarakaldek elkarteak, danborrada bakoitzaren estandartea jarri du zintzilik Armeria plazan, ohikoa den moduan. Hiriaren alde horretako danborradek Armeria plaza izango dute gune nagusi gisa San Sebastian egunean, eta aurten, hainbat auzotar omenduko dituzte. Alde batetik, 2019ko Urrezko Danborraren irabazlea, Rosa Garcia aktibista, Donosti eta Santiagomendi danborradek batera egingo duten bandera igoeran egongo da, larunbatean, hilaren 19an, 1:15ean.
Era berean, Amara Berri, Ikasbide, Lagun Berriak eta Urtokik igandean, 19:45ean, egingo duten elkarretaratzean parte hartuko du baita ere Garciak. Elkarretaratze berean, ekainaren 28an Leonen auto batek harrapatuta hildako Jose Carlos Carrasco eta Nerea Aguirreren omenez minutu bateko isilunea egingo dute. Senar-emazteak Donejakue bidea egiten ari ziren bizikletan, 12 urteko semearekin batera, auto batek harrapatu zituenean. Gidariari alkohol froga egin zioten eta legeak baimendutako tasa bost aldiz gainditu zuen. Aguirre eta Carrasco, Donosti danborradako kideak eta El Sauceko bazkideak ziren. Bestalde, ostiralean, hilaren 18an, auzoko danborraden ordezkaritza batek Zorroaga zahar egoitzan joko du, 17:30ean.
Paco Etxeberria ere omenduko dute, izan ere, 2019ko ohorezko zapia jasoko du antropologo eta auzitegi medikuak. Saria igandean emango diote, hilaren 20an, Amara Berri Ferrerias ikastetxean, danborradaren ibilbidearen hasieran. Amara Berri ikastetxeko danborradak sari berezi bat eman ohi du urtero San Sebastian egunean: ohorezko zapia. Auzoaren alde edo danborradaren alde, alor kultural edo sozialean, lan egin duen pertsona, elkarte edo erakunde batek egindako lana aitortzeko saria da duela 25 urtetik, eta aurten, Etxeberria izan da saritua.
