'Zer nahi duzu parkean?' prozesuaren emaitzak ezagutzera emango dituzte igandean
(Argazkia: Uliako Lore Baratzak) Uliako Lore Baratzetako kideek urrian abiatutako Zer nahi duzu parkean? prozesutik jasotako emaitzak ezagutzera emango dituzte igandean. Dinamika honen bidez auzotarren iritzi eta proposamenak jaso dituzte, hainbat jardunalditan banaturik, Uliako mintegien proiektua auzo osora zabalduriko era parte-hartzaileago batean garatzen jarraitzeko.
Datuen aurkezpen ekitaldia parkeko berotegian egingo dute, Dunal eta Xomorro taldeen laguntzarekin. Eguna 10:30etan abiatuko dute, mintegiak txukuntzeko egingo duten auzolanarekin. 12:00etan prozesu parte hartzailearen emaitzak aurkeztuko dituzte eta 13:00etan, berriz, The Cotton Tails taldearen kontzertuaz gozatu ahal izango dute. 14:30ean bazkaria egingo dute, bakoitzak etxetik ekarriko dituen janekin eta Gypsy Jazz taldearen doinuez lagundurik.
