Realak 5.000 gonbidapen banatuko ditu bazkideen artean igandeko finalerdirako
Neurketa 16:30ean izango da, Sevillaren aurka.
Igandean, 21.234 zalek ikusi zuten Reala eta Athleticen arteko derbia Anoetako harmailetatik. (Argazkia: Reala) Realak bere historiako bigarren kopako finalerdia jokatuko du igandean, Sevillaren aurka, eta aurreko igandeko derbian bezala, klubak Anoeta estadioa zalez beterik ikusi nahi du honakoan ere. Horregatik, egun hauetan bazkide guztien artean 5.000 gonbidapen banatuko ditu Realak bere webgunearen bitartez.
Zaleen eskaera kopuruak eskainitako gonbidapenena gaindituko balu, klubak zozketa baten bidez banatuko dituela adierazi du. Zozketa horren emaitza ostegunean jakinaraziko litzaieke posta elektroniko bidez parte hartu duten bazkideei.
Sarrera bat egokitu zaien zaleek hauek non jasotzeko informazioa jasoko dute posta elektroniko berean. Sarrerak Anoeta estadioan irekiko duten leihatila batean jaso ahal izango dituzte, hurrengo ordutegietan:
- Larunbatean: 10:00etatik 13:00etara, 16:30etatik 18:30era eta 20:30etik 21:30era.
- Igandean: 10:00etatik partida hasi arte.
Gainerako zaleek, 10 eta 20 eurotan erosi ahal izango dituzte finalerdirako sarrerak, harmailetako goiko eta beheko eraztunetan, hurrenez hurren.
