10. Sudur Krosan izena emateko epea ireki dute
Egiako parkeak 10. Sudur Krosa jasoko du apirilaren 6an, eta lasterketan izena emateko epea jada zabalik dagoela jakinarazi dute proba herrikoiaren antolatzaileek. Lasterketak sei kilometroko ibilbidea izango du, eta urtero bezala, Sudur Txikia izeneko haurrentzako probaren ondoren egingo dute.
Krosa 17:00etan hasiko da, eta izen ematea zazpi euroren truke egin daiteke, herrikrosa.eus webgunean. Lasterketaren egunean, aldiz, dortsala eskuratzeko prezioa hamahiru eurokoa izango da
Txikien lasterketari dagokionez, lasterketa ordubete lehenago hasiko dute, 16:00tan, eta 0 eta 12 urte bitarteko haurrek hartu ahal izango dute parte bertan. Egiako Kata tabernan, Groseko Pandoran eta Parte Zaharreko Aurreskun egin daiteke izen ematea, hiru euroren truke.
