Gipuzkoako Ostalarien Elkartearen egoitzan ekintza egin du Ernaik, prekarietatea salatzeko

2019/05/01

Atzo, Langileen Nazioarteko Egunaren bezperan, ekintza bat egin zuten Donostiako Ernaiko kideek Gipuzkoako Ostalarien Elkartearen egoitzan. Hainbat kidek maionesarekin egindako pintxoak bota zituzten egoitzaren aurrealdeko hormara, gazteek pairatzen duten prekarietatea salatzeko. “Ernaiko kideok salatu nahi izan ditugu prekarietatera kondenatu eta geure miseriarekin aberasten diren horiek”, adierazi zuen gazte antolakundeak ohar batean.

Gipuzkoako Ostalarien Elkartea aukeratu zuten gazteen lan eta bizi baldintza “penagarrien” erantzule gisa, eta horrek sustatzen dituen “lanaldi amaigabeak, soldata baxuak, lan-erritmo jasanezinak, eta abar” kritikatu zituzten. Gaineratu zuten ostalaritzako enpresariak ez direla prekarietate horren sustatzaile bakarrak, baina “oso bistakoa” dela tabernetan eta jatetxeetan zein nagusikeriaz jokatzen duten.

Sare sozialetan zabaldutako oharrean, ostalaritza patronala, eta EAJ eta PSE alderdiak jarri zituzten jomugan: “Mikel Ubarrechena –Gipuzkoako Ostalarien Elkarteko presidentea– eta Eneko Goia eta Ernesto Gasco txanpon beraren bi aldeak dira”. “Elite ekonomiko eta politiko hau da gazteok Donostian bizi ezin izatearen errudun, monokultibo turistikoan oinarritutako hiri-eredua bultzatzen dutenak”, baieztatu zuten.

Halaber, maiatzaren 2an eta 3an Turismo Gastronomikoaren Munduko Foroa egingo dute Donostian, eta Ernaik herri mugimenduak foroa salatzeko egingo dituen mobilizazioekin bat egingo duela jakinarazi du.