V. Kritika Lehiaketa abian da, kritikari berriak bilatzeko
Uxue Arzelus, 2015eko Zinea atariaren Kritika Lehiaketaren irabazlea. (Argazkia: Irutxuloko Hitza) 
V. Kritika Lehiaketa martxan jarri du beste behin Zinea atariak. “Aurten ere, zinemari buruzko errepertorioa biribiltzeko asmotan, zinema-aretoetan ikusgai diren filmen kritikak argitaratzeko asmoa dugu”, jakinarazi dute atarikoek. Hain zuzen, zeregin horretaz arduratuko den norbait bilatzeko helburuarekin antolatu dute kritika lehiaketa.
Irabazleak, 2019ko ekainetik aurrera urtebetez Zinea atarian zinema-kritikari gisa jarduteko aukera izango du, azken urteetan Uxue Arzelus, Aritz Sorzabal, Mikel Zumeta eta Zigor Etxebeste aritu diren moduan. Zinea atariaren eta Irutxuloko Hitzaren arteko lankidetzaren ondorioz, Etxebesteren kritikak irakur ditzakete irakurleek ostiralero astekarian, eta irutxulo.hitza.eus webgunean.
Parte hartu nahi dutenek, euskal film bat aukeratu beharko dute, aukeran 2018tik aurrera estreinatutakoa, eta horren kritika bidali beharko dute info@zinea.eus helbidera. Jasotako kritika guztiak argitaratuko dituztela jakinarazi dute Zineakoek, “epaimahaikideek lanok baloratzeaz gainera, atariko irakurleek ere hauek irakurri eta bere balorazio propioak egin ditzaten”.
Kritikari gisa hautatzeko deialdi irekirako honako baldintza hauek bete behar dira:
- Parte hartzaileek euskal film bat hautatu eta haren inguruko kritika egin behar dute.
- Kritikek izan ohi duten formatua errespetatu behar da. 300 eta 400 hitz bitartekoa izan behar du, eta filmaren izenburua, zuzendaria, urtea eta herrialdea aipatzea ezinbestekoa izango da.
- Lana bidaltzeko azken eguna maiatzaren 31 izango da (ostirala, egun hori barne), egilearen izen-abizenak, adina, herria, posta-helbidea eta telefonoa jartzea ahaztu gabe.
- Deialdira aurkeztutako kritika guztiak Zinea atarian argitaratuko dituzte lehenengoz eta, ondoren, Ganbara datutegian jarriko dituzte. Kritika bidaltzen duen hautagai orok bere lana argitaratzea onartzen du, beraz.
- Kritikaria aukeratzeko, datozen egunetan aurkeztuko duten aditu talde baten iritzia izango dute kontuan Zinea atarikoek. Horrez gain, kritikek dituzten iruzkin positiboak ere kontuan izango dituztela jakinarazi dute, kritika gustuko zergatik duten azaltzen dutenak. Lehentasuna epaimahaiak izango du.
- Pertsona bakoitzak kritika bakarra bidaltzeko aukera du.
- Irabazleak urtebeteko konpromisoa hartuko du Zinea atariko arduradunekin, eta deialdira aurkeztutako lanaren ezaugarri antzekoak dituen kritika osatu beharko du astero, asteazkenetan.
- Egindako kritika bakoitzagatik ordainduko zaio, ohiko kolaborazioen prezioan.
Edozein zalantza izanez gero, info@zinea.eus helbidera idatzi daiteke, edota 943 504 206 telefono zenbakira deitu.
