Ilusioz beteta hasiko dira Morlansko jaiak
Gaur arratsaldean hasiko dira Morlansko jaiak, faroltxoaren ohiko piztearekin. Aurtengo jai batzordea guztiz berria bada ere, adin guztietako pertsonentzako egitarau zabala prestatu dute astebururako.
Morlansko jai batzordeko kide batzuk Leire plazan, bi erraldoirekin. (Argazkia: Beñat Parra) 
Merienda batekin eta Gari, Montxo eta Joselontxo pailazoen emanaldiarekin hasiko dira Morlansko bizilagunak aurretik duten asteburu luzerako berotzen. Ondoren, 19:00etan, jaiak ofizialki hasiko dira, faroltxoaren pizte ohikoarekin. Lourdes Oliva jai batzordeko kideak azaldu duenez, auzotarrak oso inplikatuta daude jaiekin, eta jai batzordea berria bada ere, jaiak “ilusio handiz” antolatu dituztela adierazi du.
Jaietako gune nagusia Leire plaza izango da, non, txosnak eta agertoki bat jarriko dituzten. Olivak azaldu duenez, plazaren atzealdean ipiniko dituzte barrakak, eta goiko aldean haurrentzako puzgarriak. Euria egingo balu, festak aurrera jarraituko duela nabarmendu du Olivak, Leire plazako arkupeetara eramango bailituzkete jarduera guztiak.
“Publiko guztientzako musika eta janari ona” dira Olivak aurtengo egitarautik nabarmendu dituen bi ezaugarriak. Izan ere, haur, gazte zein helduei gustatuko zaien musika egongo dela deritzo jai batzordeko kideak: “Rocka egongo da gaur –bai eszenatokian eta baita txosnan ere–, bluesa bihar goizean, batukada arratsaldean eta berbena giroko diskofesta gauean”. Janari aldetik ere hainbat jarduera antolatu dituzte, hala nola, gaurko sardina jana, biharko txokolate jana eta bazkari eta afari herrikoiak.
Jai batzorde berria
Lehen aldiz antolatu dituzte jaiak aurtengo jai batzordeko kideek, eta Olivak azaldu duenez, otsailetik daramate antolatzen. Jende aldetik arazorik izan ez badute ere, diru aldetik larri ibili direla esan du Olivak, udalaren laguntza «minimoa» delako. Jendea jaietara joatera animatu du jai batzordeko kideak, “jaiek aurrera egin dezaten eta datorren urtean hobeak izan daitezen”.
Hona jaietako egitarau osoa:
Ostirala, maiatzak 17:
17:00 Jaien hasierako merienda.
18:00 Gari, Montxo eta Joselontxo pailazoak.
19:00 Faroltxoaren piztea.
19:30 Danborrada bertan behera gelditu da, eta euria egiten ez badu, Holi festa egingo dute.
20:30 Sardina jana
22:00 Zezensuzkoa
22:15 Musika zuzenean: Back taldea.
00:30 Rock in the txosna.
Larunbata, maiatzak 18:
10:30 Multikirolak ikastolan.
11:00 Haurrentzako jolasak.
11:30 Mahai-futbol txapelketa.
12:00 Barney’s Band taldearen kontzertua.
12:30 Lagunekin sukaldatzen.
13:00 Olinpiadak.
14:30 Auzo bazkaria.
16:30 Mus txapelketa.
16:30 Haurtxoko Gaztelekua, 5-17 urte.
17:00 Nagusientzako futbola.
18:00 Txokolate jana.
18:30 Batukada eta erraldoiak.
20:30 Afari musikatua.
22:00 Diskofesta.
Igandea, maiatzak 19:
9:00 Diana.
11:00 Haurrentzako txirrindularitza.
12:00 Plaza dantzak eta sagardo dastaketa.
14:00 Patata tortilla dastaketa.
14:30 Helduen bazkari autogestionatua.
16:00 Puzgarriak.
16:00 Break dantza eta parkour ikastaroa.
17:15 Apar festa.
18:00 Buruhandiak eta erraldoiak.
19:00 Jaien itxierako txupina.
