Antiguako Gazte Eguna egingo dute larunbatean
San Joan jaietako giroa asteburuan piztuko da Antiguan, auzoan urteroko legez ospatzen duten gazte egunarekin. Auzotarrek ekitaldiz beteriko egitarauaz gozatu ahal izango dute larunbatean, Txantxarreka gaztetxean eta Mikel Laboa plazako frontoian, goizetik gauera arte.
Eguna plan bikoitzarekin abiatuko dute. Izan ere, 09:00etatik aurrera futbito txapelketa mistoa egingo dute frontoian, Txantxarrekako kideak gaztetxe parean horma-irudi bat margotzen arituko diren bitartean. Herritarrei nahiago duten planean parte hartzeko gonbita luzatu diete antolatzaileek.
Eguerdian, berriz, bazkari herrikoia egingo dute gaztetxean, eta bazkalostea bingo musikatuarekin igaroko dute. Ondoren, haurrentzako musika eta dantza proposamena eskainiko dute frontoian, 16:30etik aurrera. 19:00etan, berriz, kontzertu emanaldia izango dute Txantxarrekan, Blind Blind Boys eta Komando Patxaran taldeen eskutik.
Futbito txapelketarako izen ematea frontoian bertan egin ahal izango da, taldeko hamabost euro ordainduta. Bazkarirako tiketak, berriz, Platero eta Trikuharri tabernatan eskuratu ahal izango dira, hamar euroko prezioan.
