Udalak abian jarri du merkataritzan eta ostalaritzan 45 urtetik gorako pertsonak kontratatzeko deialdia
2016an aurkeztu zuen udalak 'Donostia UP!' programa. 
Ekonomia bultzatzeko DonostiaUP! 2019 planaren barruan, langabezian aurkitzen diren 45 urtetik gorako pertsonak kontratatzeko programa berria abian jarri du Donostiako Udalak. Helburua da etorkizun profesionala ostalaritzako eta merkataritzako sektoreetara birbideratu nahi dutenen kontratazioa bultzatzea.
Diru-laguntzaren eskaerak abenduaren 13ra bitarte aurkez daitezke. Donostiako merkataritzako eta ostalaritzako sektoreetako establezimenduek kontrataziorako laguntza horiek eskuratu nahi badituzte, Donostiako Sustapenaren webgunearen bitartez eska ditzakete.
Bi diru-laguntza mota sortu dituzte. A modalitatea, gutxienez hiru hilabeteko kontratua litzateke 3.000 eta 6.000 euro arteko soldata orokorrarekin. B modalitatea, berriz, kontratu mugagabea litzateke 7.000 eta 7.500 euroko zenbatekoarekin.
Bi modalitateetan, diru-laguntza %10 eta %15 artean gehituko da. A modalitateko kontratazioei dagokienean, gutxieneko lanaldia %75ekoa duen eta gutxienez 13 hilabeterako den kontratu-mota mugagabea izanez gero, laguntza gehigarria eskuratu ahal izango da: 1.000 euro 45 urtetik gorako gizonen kontratazio mugagabearen kasuan, eta 1.500 euro 45 urtetik gorako emakumeen kontratazio mugagabearen kasuan.
Diru-laguntzaren modalitate ezberdin bakoitzerako, dagokion zenbatekoari beste %10a erantsiko zaio kontratatutako pertsonak honako talde hauetakoren batekoak badira: 55 urtetik gorako gizonak eta iraupen luzeko gizon langabeak.
Beste %15 gehituko da kontratuak talde hauetakoren bateko 45 urtetik gorako pertsonei eginez gero: 55 urtetik gorako emakumeak, iraupen luzeko emakume langabeak, seme-alaba adingabeak haien kargu dituzten emakume guraso bakarrak, desgaitasuna duten emakumeak eta genero indarkeriaren biktimak diren emakumeak.
Kasu guztietan, laguntzaren azken zenbatekoak ezingo du gainditu kontratatutako pertsonen soldata eta gizarte segurantzako kostuen %100a, kalte-ordainak barne.
